«Առավոտը» ԱԺ նախագահին խնդրեց իր վերաբերմունքն արտահայտել ՀԺԿ քաղխորհրդի հուլիսի 27-ի նիստի արձանագրության մեջ նշված հետեւյալ գնահատականի վերաբերյալ. «Արմեն Խաչատրյանի վարքագիծը ոչ միայն չի նպաստում ՀԺԿ հեղինակության բարձրացմանը, այլեւ ժողովրդի լայն շրջանում ստվերում է ՀԺԿ անդամի բարոյական կերպարը»։
«Ես առաջին անգամ եմ լսում այդ փաստաթղթի եւ սույն ձեւակերպումների մասին»,- ասաց պրն Խաչատրյանը եւ առաջարկեց նորից ճշտել այդ տեղեկությունը։ Ճշտեցինք, եւ ՀԺԿ քաղխորհրդի մի քանի անդամներ հաստատեցին մեջբերվածի իսկությունը։ Մինչդեռ ԱԺ նախագահը վստահ հայտարարում էր. «ՀԺԿ-ն ու ես միասնական ենք եւ, կարծում եմ, բավական է իմ եւ ՀԺԿ-ի միջեւ որեւէ բաներ գցելը։ Ուրեմն, հիշեք միշտ. ՀԺԿ-ն կանգնած է իմ թիկունքին, ես էլ՝ ՀԺԿ-ի թիկունքին»։
ՎԱՐՔ ԳԼԽԱՎՈՐԱՑ
Կարդացեք նաև
Իրազեկ աղբյուրները վկայում են, որ ԱԱՆ 4-րդ գլխավոր վարչության պետ Արմեն Ավետիսյանին է պատկանում գեղարվեստի ինստիտուտի ետնաբակում կառուցվող առանձնատունը, որը վերագրվել էր ԱԺ նախագահին։ Տնտեսական հանցագործություններով զբաղվող այս վարչության պետի վերաբերյալ այլ լուրեր էլ կան։ Մասնավորապես, որ Արմեն Ավետիսյանը վերջերս շուրջ 100 հազար դոլար արժողությամբ «Մերսեդես» է «նվեր» ստացել որոշ ապրանքատեսակների խոշոր ներկրող Լֆիկ Սամոյից։
ԱՆԱՊԱՏՈՒՄ ԿԱՆՉՈՂԻ ՁԱՅՆԸ
«Միլիոնով բռակ ենք տվել։ Հա՜յ ենք, էլի,- ԱԺ հայտարարությունների ժամին ամբիոնից բացականչեց Արշակ Սադոյանը։- Բոլո՛րս ենք մեղավոր, որ թույլ ենք տվել մի իշխանական համակարգ, որտեղ նախագահն ամեն ինչի լիազորություններ ունենալով՝ ոչ մի պատասխանատվություն չունի»։ Այս թեմայով դատողություններից զատ՝ արմատական ընդդիմադիր ԱԺՄ-ից մնացած վերջին մոհիկանը նաեւ ասաց. «Ի՞նչ ենք անելու մենք, եթե առանց նույնիսկ լուրջ թշնամի տեսնելու ներսում թե դրսում՝ վախենում ենք մի քիչ ակտիվանալ»։ Թերեւս «թեժ աշնան» գաղափարը փրկելու հուսահատ ճիգն էր նրա նախաձեռնությունը՝ սեպտեմբերի վերջին Երեւանում մի մեծ հավաք կազմակերպել, որտեղ պիտի պարտադրեն իշխանություններին՝ փոխել որդեգրված քաղաքականությունը։
