ՀԿԿ կենտկոմի գլխավոր քարտուղար Վլադիմիր Դարբինյանը չէր բացառել, որ սեպտեմբերին Լեոնիդ Հակոբյանը հրաժեշտ տա նախարարի աթոռին՝ գիտությամբ զբաղվելու համար։ Ի հավելումն նշենք, որ «Առավոտին» հասած լուրերի համաձայն, Լեոնիդ Հակոբյանը նշանակվելու է տնտեսագիտական համալսարանի ռեկտոր։ Սույն լուրի իսկությունը պարզելու փորձ չարեցինք՝ Լեոնիդ Հակոբյանի խորհրդական Սամվել Ամարյանի բռի վերաբերմունքին դարձյալ չարժանանալու համար։
ՍԵՐԺՆ ՈՒԺԵՂ ՉԷՐ՝ ԻՐԵՆՔ ԷԻՆ ԹՈՒՅԼ
Նախագահին առընթեր Մարդու իրավունքների հարցերի հանձնաժողովի անդամ Վարդան Հարությունյանը հակառակվեց տարածված այն համոզմանը, թե «Սերժ Սարգսյանը կարողացավ հաղթել երկրապահներին եւ նրանց շուրջ համախմբված բոլոր ուժերին։ Իրականում ոչ թե Սերժ Սարգսյանը նրանց հաղթեց, այլ իրենք պարտվեցին, քանի որ բավականաչափ խելոք չգտնվեցին»։
Կարդացեք նաև
Կարդացեք նաեւ էջ 3։
ԹՅՈՒՐԻՄԱՑՈՒԹՅԱՆ ՄԵՋ ԳՑԵԼՆ ԷԼ ՉՓՐԿԵՑ
ԱԺ պատգամավոր, «Քիմռեակտիվներ» ձեռնարկության տնօրեն Վոլոդյա Բադալյանին իր սկզբնական կազմակերպությունը միայն նկատողություն է հայտարարել բաշխիչ ցանցերի մասնավորեցման օրենքին ՀԺԿ-ի դիրքորոշմանը հակառակ քվեարկելու համար։ Կուսակցական այս մեղմ պատժի պատճառն այն է եղել, որ Վոլոդյա Բադալյանը համոզել է, թե իրեն թույլատրվել է «կողմ» քվեարկել։ Թյուրիմացությունը պարզվելուց հետո, սկզբնական կազմակերպությունը որոշել է նորից անդրադառնալ նրա հարցին։ Եվ, ըստ ամենայնի, այս անգամ պատիժն այլեւս մեղմ չի լինի։
ՆԱԽ՝ ՔՈ ԾԱՌԸ, ՀԵՏՈ՝ ԱՆՏԱՌԸ
Պարտիզակ գյուղի խմելու ջրի ջրագիծը բացվելուն պես գյուղացիներից մեկը տեղում կտրել էր ընդհանուր խողովակը եւ, ջուրն անցկացնելով իր տնամերձը, ջրում էր սեփական լոբին։
Ջրագծի բացման մասին կարդացեք 2-րդ էջում։
