Երեւանում տարածվել է «Կգա հատուցման օրը» վերնագրված երկու էջանոց մի թռուցիկ, որը ստորագրված է «Հոկտեմբերի 27-ի վրիժառուներ»։ Այս թռուցիկում նշված է. «Ակնհայտ է դառնում, որ այս իշխանությունների օրոք հոկտեմբերի 27-ի գործն, ըստ էության, չի բացահայտվելու, եւ մենք մեր լռությամբ դառնալու ենք այդ ստոր դավադրության մասնակիցը»։ Ծախված լինելու մեջ մեղադրվում են «Միասնության» եւ ԵԿՄ-ի գործիչները, զինդատախազն ու զոհվածների հարազատները։ Թռուցիկի անանուն հեղինակները նշում են, թե բոլորը գիտեն՝ ովքեր են հոկտեմբերի 27-ի պատվիրատուները եւ իրենք նշում Քոչարյանի, Սերժ Սարգսյանի եւ Հրանտ Մարգարյանի անունները. «Ով՝ ով, բայց մենք՝ Վազգենի իսկական ընկերներս, չենք հանդուրժելու ու մեկ առ մեկ շանսատակ ենք անելու բոլոր նրանց, ովքեր ինչ-որ կերպ կապված են նրա սպանության հետ»։
«ԱԶԳԱՅԻՆ ՄԻԱԲԱՆՈՒԹՅՈՒՆԸ» ՎԱՐՉԱՊԵՏԻ ՀԵՏ ՉԻ ՀԱՄԱԳՈՐԾԱԿՑԻ
Վերլուծաբանների դիտարկումներով, ՀԺԿ-ի եւ «Ազգային միաբանության» դաշինքին կարող են հարել նաեւ, այսպես կոչված, ռեւանշիստական ուժերը։ Այս հեռանկարի վերաբերյալ «Առավոտի» հարցին Արտաշես Գեղամյանը հարցով պատասխանեց. «Ռեւանշիստական ուժեր ասելով ՀՀՇ-ի՞ն նկատի ունեն։ Ի՞նչ եք կարծում, ՀՀՇ-ի ամենասերտ դաշնակիցը արդյոք Հանրապետական կուսակցությո՞ւնը չէր։ Անգամ իսկ ներկայիս կառավարությունում հիմնական լծակները գտնվում են կա՛մ նախկին ՀՀՇ-ականների, կա՛մ ՀՀՇ-ից սերված կուսակցությունների ներկայացուցիչների ձեռքում՝ ընդհուպ մինչեւ վարչապետը։ Եթե մտավախությունն այն է, որ մենք համագործակցելու ենք ներկայիս վարչապետի հետ՝ հանգստացնեմ, ո՛չ։ Դժվարանում եմ ասել, թե արդյոք ՀԺԿ-ն կհամագործակցի՞»։
Կարդացեք նաև
Արտաշես Գեղամյանի հետ հարցազրույցը կարդացեք 3-րդ էջում։
ՀՀԿ-Ն ԼՎԱՆՈ՞ՒՄ Է ՁԵՌՔԵՐԸ
ՀՀԿ խորհրդի անդամ, ԱԺ պատգամավոր Գալուստ Սահակյանն «Ազատություն» ռ/կ-ին տված հարցազրույցում հայտարարել է, որ եթե «Միասնություն» դաշինքում կամ խմբակցության մեջ «որեւէ տեղաշարժ լինի՝ դրա ամբողջ պատասխանատվությունը կընկնի Ժողովրդական կուսակցության վրա»։
