ԳԹՈՒԹՅՈՒՆ՝ ՊԱՆԹՈՒՐՔԻԶՄԻ ՀԱՇՎԻՆ «Գթություն» բարեգործական միության նախագահ Խաչիկ Ստամբոլցյանը վերջերս հրապարակավ հայտարարել է. «Լեւոն Տեր-Պետրոսյանը կա՛մ մասոնական օթյակի անդամներից է, կա՛մ պանթուրքական ծառայությունների կողմից գնված մարդ»։ Եթե չանտեսենք այն փաստը, որ ՀՀ նախագահ եղած տարիներից մինչեւ օրս Լեւոն Տեր-Պետրոսյանը Մատենադարանի գիտաշխատողի իր աշխատավարձը բարեխղճորեն փոխանցում է «Գթություն» բարեգործական միությանը, ապա վստահ կարելի է արձանագրել, որ մասոնական օթյակից կամ պանթուրքական ծառայություններից Խաչիկ Ստամբոլցյանն իր համեստ մասնաբաժինն ունի, որով էլ այս կարգի գթություններ է անում։ ՀՈՒՄԱՆԻՏԱՐ ՃԱՂԵՐ «Առավոտին» հասած լուրերի համաձայն, հումանիտար նկատառումներով, Արցախ է տարվել «Սամվել Բաբայան+15» գործի համար մետաղյա ճաղեր, որոնք, ըստ չճշտված լուրերի, «Վահան Հովհաննիսյան+30» գործի դատաքննության համար պատրաստված ճաղերն են եղել։ Ի դեպ, ահաբեկիչների համար նախատեսված ճաղերը «խերով» եղան. նրա ետեւից դուրս եկածները հետագայում դարձան ահաբեկչության դեմ պայքարող հանձնաժողովի նախագահներ։ Ո՞Վ ՇԱՀԵՑ Պարույր Հայրիկյանը չդարձավ ԱԺ պատգամավոր։ Եվ սկսեց երգեր գրել։ Կոմպոզիտոր Ռոբերտ Ամիրխանյանը դարձավ ԱԺ պատգամավոր։ Եվ սկսեց երգեր չգրել։ Պարույրը ոչինչ չկորցրեց պատգամավոր չդառնալով. ավելին, շահեց՝ նա «Ճերմակ ամպ» երգով դարձավ մրցանակակիր…
