ԲԱՆԱԿՑՈՒԹՅՈՒՆՆԵՐ, ՈՐ ՄԻՇՏ ՔՈՉԱՐՅԱՆԻ ՀԵՏ ԵՆ Մոսկվայում երեկ ավարտվեց ԱՊՀ հերթական գագաթաժողովը, որին իրենց մասնակցությունն էին բերել նաեւ ՀՀ նախագահ Ռոբերտ Քոչարյանը եւ վարչապետ Անդրանիկ Մարգարյանը։ Հայաստանի համար մեր նախագահի մասնակցությունն այդ գագաթաժողովին էական էր այնքանով, որ նախագահ Քոչարյանը մի հաճելի առիթ կունենար Մոսկվայում սեղմելու ՌԴ նախագահ Վլադիմիր Պուտինի աջը, սրախոսություններ փոխանակելու ծերացող Ալիեւի հետ եւ վերջինիս հետ էլ շարունակվող երկխոսության նոր պատրանք ստեղծել։ Բնականաբար, հայաստանյան պատկան գերատեսչությունները ոչ մի ինֆորմացիա՝ հերթական «բանակցային պրոցեսից», չունեն։ Եվ եթե նախագահ Քոչարյանի մասնակցությունը ԱՊՀ այս գագաթաժողովին այնքան էլ պրոդուկտիվ չի եղել (տեղեկատվությունը հակառակի մասին լռում է), ապա վարչապետ Անդրանիկ Մարգարյանն, ըստ «Ազատություն» ռադիոկայանի լրատվության, հանդիպել է Ուկրաինայի վարչապետին։ Ավելին, նրանք պայմանավորվել են հոկտեմբերին Կիեւում անցկացնել տնտեսական համագործակցության գծով հայ-ուկրաինական միջկառավարական հանձնաժողովի նիստ։ Հանդիպմանը նախատեսվում է նաեւ փաստաթղթերի ստորագրում։ Ուկրաինայի վարչապետի մամուլի քարտուղարը տեղեկացրել է, որ խոսք կա նաեւ Հայաստանում գազամուղի կառուցմանը Ուկրաինայի մասնակցության մասին։ Երեկ երեկոյան՝ ի թիվս Թուրքմենստանի, Ուզբեկստանի, Բելառուսի նախագահների, Վլ. Պուտինը ծրագրել էր հանդիպում նաեւ ՀՀ նախագահ Քոչարյանի հետ։ Եթե պրն Քոչարյանը շատ գաղտնապահ չլինի, վաղվա համարում այդ հանդիպման մասին առավել մանրամասն տեղեկատվություն կհաղորդենք։ Լ. Ա.
