«Շատ մասնավոր, ոչ պաշտոնական ելույթ էր, որը մեկնաբանությունների կարիք չունի»,- «Առավոտին» ասաց ԱԳՆ խոսնակ Արա Պապյանը, ապրիլի 25-ին Գլենդելում հայ համայնքի հետ հանդիպման ժամանակ Վարդան Օսկանյանի ելույթի առնչությամբ։ Նա նաեւ հիշեցրեց, որ տարածքների փոխանակման առաջարկի վերաբերյալ ՀՀ պաշտոնական դիրքորոշումն արտահայտվել է բազմիցս։ Սակայն միայն Գլենդելում էր ԱԳ նախարարը բացահայտել այդ առաջարկի էությունը. «Մեղրին տրվում է Ադրբեջանին, Լաչինը Ղարաբաղի հետ տրվում է Հայաստանին։ Մեղրիով Հայաստանին տրվում է մի սուվերեն ճանապարհ, որով Հայաստանը կարող է սուվերեն հաղորդակցության մեջ մտնել Իրանի հետ»։ Այս ամենն արձանագրած «Կալիֆոռնիա կուրիերը» մեջբերել էր նաեւ պրն Օսկանյանի հետեւյալ արտահայտությունները, թե այս առաջարկությունը մտածելու տեղիք տալիս է, «ինչ-որ տրամաբանություն կա» եւ «պետք է դրվի լուրջ քննարկման»։
ԵՐԿՐԱՊԱՀՆԵՐԸ ՄԻԱՅՆ ՀԱՄՈԶԵ՞Լ ԷԻՆ
«Առավոտի» հարցին, թե արդյոք ԵԿՄ-ն ընտրախախտումներ էր թույլ տվել 1998-ի նախագահական ընտրությունների ժամանակ, «Հայաստան» խմբի ղեկավար Մյասնիկ Մալխասյանը պատասխանեց. «Այսօր խախտում է ընկալվում միայն քվեատուփի մեջ բյուլետեններ լցնելը։ Բայց մեկ ուրիշ հանգամանք հաշվի չենք առնում՝ մարդիկ իրոք ցանկություն չունեն, բայց մենք նրանց համոզում ենք ինչ-որ ձեւով եւ բերում նրան, որ իրենց ցանկությանը հակառակ քվեարկություն են կատարում։ Սա էլ է, չէ՞, անարդարացիություն»։
Մանրամասն՝ 3-րդ էջում։
Կարդացեք նաև
ՏՆՏԵՍԱԿԱՆ ՕՐԵՆՔՆԵՐԸ ԽԵՂԴՈՒՄ ԵՆ
Կառավարության երեկվա նիստում որոշվեց առաջարկել ՀՀ նախագահին՝ հունիսի 5-ին, ժ. 11.00-ին՝ սահմանված կարգով հրավիրել ԱԺ արտահերթ նիստ, որի օրակարգում կներառվեն մի շարք տնտեսական օրենքներ։ Կառավարության նիստի մասին կարդացեք 2-րդ էջում։
