Արկադի Ղուկասյանի դեմ մահափորձի առնչությամբ Բաբայան եղբայրների ձերբակալության փաստը «Առավոտի» խնդրանքով գնահատելիս Հրանտ Խաչատրյանը նշեց, թե ընթանում է քննություն եւ հարկ է սպասել դրա արդյունքներին։ Եթե նույն մոտեցումը նույն դաշինքի գործիչները (եւ ոչ միայն) պատրաստ լինեն կիրառել նաեւ հնչեղություն ունեցող այլ գործերի պարագայում, ներքաղաքական լարվածությունը զգալիորեն կլիցքաթափվի։
ՎԱՏ ԼՈՒՐ
ԱԻՄ-ի փոքր վեհաժողովում երեկ անդրադարձել են այն հարցին, թե արժե՞, որ Պարույր Հայրիկյանն իր թեկնածությունն առաջադրի պատգամավորական թափուր ընտրատարածքներում։ Նորայր Խանզադյանը փորձել է նրան համոզել, որ խորհրդարանում «մի ծաղկով գարուն կարող է գալ»։ Մեկ այլ պատվիրակ վստահեցրել է, թե Հայրիկյանի մասնակցությունը նման կլինի «խոզերի առջեւ մարգարիտ շաղ տալուն»։ Հայրիկյանի մասնակցությանը սկզբունքորեն դեմ է եղել Ներսես Զեյնալվանդյանը, որը հիշեցնենք, ԱԻՄ-ի նախագահն է. «Ընդհանրապես պետք չէ Հայրիկյանին ուղարկել այնտեղ։ Ի՞նչ եք ուզում էս մարդուց»։ Բանավեճի հերոսն այս հարցում չէր կողմնորոշվել։
