Սկսեմ աչքալուսանքից. Վանյա Սուքիասյանը երեկ ավարտեց իր հարցերն ուղղել Վահան Հարությունյանին։ Հերթն, ըստ էության, մեղադրողներինն էր, սակայն Վանո Սիրադեղյանը 3 օր ժամանակ խնդրեց, որպեսզի նախապատրաստվի եւ հարցեր տա Վահան Սերգեյիչին։ Դատական նիստը սկսվեց Վանյա Սուքիասյանի հայտարարությամբ, որն ուղղված էր «Հայոց աշխարհ» թերթի լրագրող Ս. Տռուզյանին։ Վերջինս «մեղադրվեց» պաշտպանի գործունեությունն անօրինական որակելու, «ուղղակի ցուցում» Ռ. Թովմասյանին տալու մեջ։ Պաշտպանը սպառնաց. «Շարունակելու դեպքում կմիջնորդեմ, որ դատարանի դահլիճից հեռացվի»։
Հիշողության պայծառացման մի պահի էլ Վահան Հարությունյանն «անցավ» «Առավոտի» վրայով, երբ հարցը վերաբերում էր կալանքի ժամանակ իրեն մարմնական վնասվածք հասցնելուն. «Ես դրանք համարել եմ միշտ պրն Սիրադեղյանի թիմի կամ աջակիցների կողմից ինչ-որ չեղած տեղից ճնշման փորձեր»։
Անսպասելին երեկվա նիստում Վահան Հարությունյանի ուսանողական տարիների պատմությունից էր, երբ համալսարանից հեռացվելու վտանգը կանխելու համար «գժի թուղթ» է ձեռք բերել։ «Դա գնած թուղթ էր, էդտեղից առանք»,- ասաց նա, բայց եւ չհիշեց, թե ախտորոշումը ո՞րն է եղել։ Նա նկատեց, թե «մեր նախկին լիդերներից շատերին է նման ախտորոշում տրվել»։ Դատավոր Ռազմիկ Թովմասյանը մի դարակազմիկ ասույթ տեղում հորինեց. «Լիդերներից որքան հեռու՝ այնքան լավ»։
Հաջորդ նիստը կշարունակվի մարտի 24-ին։
Կարդացեք նաև
ՌՈՒԶԱՆ ՄԻՆԱՍՅԱՆ
