Հարցազրույց Սեմյոն Բաղդասարյանի հետ
ԱԺՄ վարչության անդամ, ԱԺ պատգամավոր Սեմյոն Բաղդասարյանը ՊՆ-ի ռազմաքաղաքական վարչության պետն էր նույն ժամանակ, երբ Վազգեն Մանուկյանը պաշտպանության նախարարն էր։ Այս պատճառով հետաքրքիր էր իմանալ նրա կարծիքը ՀՀ նախագահի՝ բանակին առնչվող վերջին հրամանագրերի մասին։ «Ես համարում եմ, որ երկրի նախագահը հաստատեց, որ ինքը գլխավոր հրամանատարն է, չեմ խոսում իհարկե նրա մասին, թե ինչքանով դա կհաջողվի, իհարկե կյանքը ցույց կտա, երկրորդը՝ բանակը ինչ խոսք, ուժեղացավ, եւ երրորդը՝ շատ կարեւոր մի բան ֆիքսվեց. որ բանակը պետք է քաղաքական կյանքից հեռու կանգնած լինի։ Այս վերջինը ես շատ եմ գնահատում, որովհետեւ բոլոր ընտրությունների ժամանակ, էլ չեմ ասում 96-ի մասին, հենց ժողովրդավարությունը գալիս էր, դեմ էր առնում բանակի միջամտությանը։ Ես համարում եմ, որ հրամանագիրը մեր պետական կառուցվածքից, մեր Սահմանադրությունից բխող հրամանագիր է, կյանքը ցույց կտա, թե դա ինչքանով էֆեկտիվ կլինի։ Բայց բանակը ինչ-որ բան չկորցրեց առայժմ, միգուցե ինչ-որ բան այնտեղ նույնիսկ լավացավ»։
Մեր հարցին՝ ճիշտ չէ՞ր լինի որ հրամանագրերի մասին նախօրոք տեղյակ պահվեր պաշտպանության նախարարին, պրն Բաղդասարյանն ասաց. «Ես դժվարանում եմ այդ հարցին պատասխանել, որովհետեւ չգիտեմ, տեղյակ պահվել է, թե ոչ։ Եթե տեղյակ պահվել է, ուրեմն շատ լավ է, դա ցույց է տալիս փոխվստահության ըմբռնումների մասին։ Եթե տեղյակ չի պահվել, դա էլի իր իրավունքն է։ Ընդհանրապես բանակում կոշտ համակարգ է գործում՝ հրամանի եւ հրամանի կատարման։ Եթե ֆորմալ մոտենանք, ցանկացած աստիճանի հրամանատարը պարտավոր չի իր հրամանը համաձայնեցնել»։
Ներքաղաքական հետագա զարգացումների մասին պրն Բաղդասարյանը չուզեց գուշակություններ անել. «Կանխագուշակությունը իմ ոճը չէ, ես անկեղծ եմ պատասխանում, ոչ թե խուսափում եմ պատասխանից։ Շատ սխալ կլիներ, եթե նման բարդ հարցերի մասին խոսենք ենթադրությունների մակարդակով։ (…) Ես նախանձով մի բան պետք է ասեմ, որ դժբախտաբար ավելի դժվար ոլորտ կա, քան հրամանատար-բանակ հարաբերությունները, դա մեր ֆինանսատնտեսական ոլորտն է, որը դժբախտաբար ոչ մի հրամանագրով չի կարելի ոչ մի բան անել։ (…) Կարեւորագույն է նաեւ մի կերպ արտագաղթը կանգնեցնելը, նույնիսկ դանդաղեցնելը։ Սա առանց աշխատատեղեր ստեղծելու հնարավոր չէ։ Նույն բանակի հարցը միանշանակ կապված է այս հարցի հետ՝ բանակը մարդկային ռեսուրսներից է օգտվում։ Երկրի մարդկային ռեսուրսները պակասում են, գնում են ամենակարողները, ո՞նց է բանակը պահվելու, ի՞նչ է լինելու»։ Սեմյոն Բաղդասարյանի հետ զրույցում չշրջանցվեց նաեւ վարչապետի տեղին ու դերին վերաբերող թեման։ Երկրում զարմանալի իրավիճակ է՝ մեկ ՀՀ նախագահն է հայտնվում անգլիական թագուհու դերում, մեկ էլ՝ ՀՀ վարչապետը։
Կարդացեք նաև
Հավանաբար Հայաստանի քաղաքական թատերաբեմում այս դերը խիստ են հավանել. «Անգլիայի թագուհու դիրքը, ըստ Սահմանադրության, տրվել է վարչապետին, քանի գործում է այս Սահմանադրությունը, դա այդպես է։ Դուք շատ լավ գիտեք, որ գրված է Սահմանադրությունը Լեւոն Տեր-Պետրոսյանի անձին համապատասխան։ Նա ուզում էր լիարժեք 100 տոկոսանոց թագավորի լիազորություններ ունենալ։ Իսկ ինչո՞ւ մյուս նախագահը չպետք է այդ լիազորությունները ունենա։ Երբ որ մենք 95-ին բղավում էինք՝ դեմ քվեարկեք այս Սահմանադրությանը, ուղղակի կներեք բառի համար՝ զոռով անցկացրին»։
Պրն Բաղդասարյանի տեսակետները լսելիս հավանաբար ընթերցողը կհիշի, որ «Ար» հեռուստաընկերության «Հետագիծ» ծրագրին վերջերս տրված հարցազրույցում պրն Սեմյոն Բաղդասարյանի կուսակից, երբեմնի պաշտպանության նախարար Վազգեն Մանուկյանը մոտավորապես ասաց, թե ինքը չի պատկերացնում, որ իր՝ պաշտպանության նախարար եղած ժամանակահատվածում նախագահ Լեւոն Տեր-Պետրոսյանն այդպիսի բան աներ (այսինքն՝ պաշտպանության նախարարությանը վերաբերող հրամանագրեր ստորագրեր առանց նախարարի իմացության)։
ՄԱՐԳԱՐԻՏ ԵՍԱՅԱՆ
