«Ազատություն» ռ/կ-ին տված հարցազրույցում ՀՀՇ վարչության նախագահ Վանո Սիրադեղյանը հայտնել է, թե նախկինի պես միանշանակ վատ չի վերաբերվում կոալիցիոն կառավարության գաղափարին. «Թող մտնեն կառավարություն, պատասխանատվությունը կիսեն վարչապետի հետ։ Այստեղ մեծ արդյունավետություն չեմ տեսնում։ Բայց ավելի լավ է կուսակցական գործիչները նախարարություններ ղեկավարեն, քան թե արհեստավարժ կոչված անդեմ, անպատասխանատու անձնավորությունները»։
ՎԱՏ ԼՈՒՐ
Ադրբեջանի նախագահի նախկին խորհրդական Վաֆա Գուլուզադեն «Ենի մուսավաթ» թերթում փետրվարի 23-ին հրապարակված հարցազրույցում պնդել է, թե Սի-Էն-Էն հեռուստաընկերության կազմակերպած բանավեճում իր փաստարկներով հաղթել է ամերիկացի միլիարդատեր Քըրք Քրքորյանին։ Մինչդեռ Վաֆա Գուլուզադեն մի քանի օր առաջ Սի-Էն-Էն-ի եթերում բանավիճում էր Ամերիկայի հայկական համագումարի ներկայացուցիչ Վան Գրիգորյանի հետ։ Բա չհարցնե՞նք, այ պարոն Գուլուզադե, որ չգիտես՝ ում հետ ես բանավիճել, ո՞նց ես պնդում, որ հաղթել ես։
