Այսուհետ ՀՅԴ Բյուրոյի միայն երկու անդամները չեն հայաստանաբնակ լինելու։ Հայաստան բնակության են տեղափոխվում Բյուրոյի եւս երկու անդամներ։ «Առավոտը» ՀՅԴ Բյուրոյի մամուլի դիվանի պատասխանատու Կիրո Մանոյանից տեղեկացավ, որ այդ երկուսը իրանահայ Ալբեր Աճեմյանն ու կանադացի Վիգեն Ս. Հովսեփյանն են։
ՍԵՐՎԻՍԻ ԽՆԴԻՐԸ
ԱԺ նախագահ Արմեն Խաչատրյանի հերթական մի արարքը իշխանական շրջանակներում խոսքուզրույցի առարկա է դարձել։ Նա պահանջել է փոխել պետական իր առանձնատան սպասքը, դժգոհելով, թե ինչու իքս պաշտոնյայի առանձնատանը կա այդ «սերվիսից», իսկ ինքը չունի։
Կարդացեք նաև
ՄԻ ԳՐՊԱՆԻՑ ՄՅՈ՞ՒՍԸ
ԼՂՀ կառավարության իրազեկ աղբյուրները հայտնեցին «Ազատություն» ռ/կ-ի Ստեփանակերտի թղթակցին, թե ոչնչով չհիմնավորված շինարարական աշխատանքների (օրինակ կենտրոնական պողոտայի ու մի կամրջի) համար անցած տարի բյուջեից հատկացվել է 1 մլրդ 200 մլն դրամ, որն էլ Ստեփանակերտի քաղաքապետ Կարեն Բաբայանը տվել է «Յուպիտեր» ՓԲԸ-ի դուստր շինարարական կազմակերպություններին։
Հիշեցնենք, որ «Յուպիտերը» Սամվել Բաբայանի սեփականությունն է։ Կառավարությունում այն կարծիքն են արտահայտել, որ բյուջետային միջոցներն այս ճանապարհով անցել են մասնավոր ձեռներեցության ոլորտ, իսկ «Յուպիտերը» չի կատարել նշված ծավալների շինարարական աշխատանքները։
