Էներգետիկայի նախարար Դավիթ Զադոյանն ԱԺ բյուջետային քննարկումների ժամանակ հայտարարեց, որ 1999-ին շուրջ 400 մլն կվտ/ժամով պակաս են էլեկտրաէներգիա արտադրել, բայց 32 մլն կվտ/ժամով ավելի են առաքել սպառողներին։ Ահա թե ինչ արդյունքների կարելի է հասնել՝ «էլեկտրաէներգիայի գերկորուստներ» անվանվող գողությունների դեմ անհաշտ պայքար մղելով։
ՎԱՏ ԼՈՒՐ
Ուղիղ մեկ շաբաթ առաջ Հայաստանի նախագահն ու վարչապետը հյուրընկալվել էին Իրանի դեսպանատանը։ Բացի այն, որ արարողակարգով ընդունված չէ, թե երկրի առաջին դեմքերը մասնակցեն մի այնպիսի ընդունելության, ուր նրանց հրավիրողն առաջին դեմք չէ՝ ընդամենը ժամանակավոր հավատարմատարը, դեռ նախագահն ու վարչապետն էլ (դարձյալ հաստատված կարգի անտեսմամբ) միմյանցից առանձին էին դեսպանատուն այցելել։ Վերջինը կարելի՞ է դիտել որպես եւս մի փոքրիկ հաստատում այն իրողության, որ գոնե օտարների աչքի առաջ էլ այլեւս չեն էլ փորձում թաքցնել իշխանության երկբեւեռությունը։
