Մարտի 21-ին ԼՂՀ նախագահ Արկադի Ղուկասյանն արդեն պիտի նշանակի խորհրդարանական ընտրությունների օրը։ Սակայն ԼՂՀ խորհրդարանը դեռ չի էլ քննարկել ընտրական նոր օրենքի նախագիծը։ «Առավոտին» Ղարաբաղի մեր աղբյուրներից մեկը տեղեկացրեց, որ ԼՂՀ-ում լուրեր են պտտվում, որ հունիսին կայանալիք խորհրդարանական ընտրությունները երկու ամսով կհետաձգվեն։
Նշենք, որ Ընտրությունների մասին օրենքով խորհրդարանական ընտրությունները 40-ից 60 օրով կարող են հետաձգվել։ Ամեն դեպքում, մենք փորձեցինք ԼՂՀ ԱԺ նախագահ Օլեգ Եսայանից ճշտել լուրի հավաստիությունը։ ԼՂՀ ԱԺ նախագահի օգնական Հայկ Թորոսյանը պարզաբանեց, որ նման խոսակցություն ինքը չի լսել։
ԴՈ՛Ւ ԱՍԱՑԵՐ
Կարդացեք նաև
Աշոտ Բլեյանի դատական վերջին նիստերից մեկի ժամանակ մի զավեշտական միջադեպ է տեղի ունեցել, որը սպրդել է լրատվամիջոցների ուշադրությունից։ Խոսելով քրեական գործից դուրս մնացած մի փաստաթղթի մասին, Աշոտ Բլեյանը հայտարարել է. «Էն հաստագլխին պիտի ասեիք, որ էդ թուղթը պիտի գործին կցած լիներ»։ Ի պատասխան պետական մեղադրողն ասել է. «Ես պահանջում եմ, որ պետական պաշտոնյաներին վիրավորանք չհասցվի», որին Բլեյանը հարցով է արձագանքել. «Ինչո՞ւ, ես ո՞ւմ նկատի ունեի»։ Եվ պետական մեղադրողը տվել է Երեւանի դատախազության քննիչ Հովիկ Պետրոսյանի անունը, որն էլ քննել էր Բլեյանի գործը։ Աշոտ Բլեյանը միայն արձագանքել է. «Դո՛ւք ասացիք»։
ՊՐՈՄԵԹԵՎՍՅԱՆ
Նշանակումներից հետո «Պրոմեթեւսում» անդրանիկ անվանակոչությունը ծնվեց երեկ. «Լուրեր» ծրագիրը եթեր կհեռարձակվի «Լրաբեր» անվամբ։
