«Ազատություն» ռ/կ-ի թղթակիցը Սամվել Գեւորգյանից հետաքրքրվել էր, թե ինչ ուշագրավ դեպք կարող էր հիշել 1998-ի փետրվարյան այն օրերից, երբ Հայաստանի նախագահից հետո իրենք եւս հրաժարական տվեցին։ Սամվել Գեւորգյանը, որ այդ ժամանակ ԱԺ պաշտպանության, ազգային անվտանգության եւ ներքին գործերի հանձնաժողովի նախագահն էր, պատմել է. «Հրաժարականիցս անմիջապես հետո Վանո Սիրադեղյանի հետ դուրս եկա միջանցք։ Ասացի՝ Վանո, էդպես էլ ինձ տուն չտվեցիր էլի։ Ձեռքը խփեց ծնկին ու ասաց. «Վա՜յ, կներես։ Մոռացել էի»։ Վանո Սիրադեղյանը հաստատել է. «Երեւի իրոք ամենահիշարժան պահն էդ է եղել»։
ՎԱՏ ԼՈՒՐ
Սահմանադրական դատարանի անդամ Ալվինա Գյուլումյանը ԱԺ գիտության, կրթության, մշակույթի եւ երիտասարդության հարցերի հանձնաժողովի կազմակերպած լսումների ժամանակ իր ելույթում հայտարարեց, թե մեր զանգվածային լրատվամիջոցներն ամեն օր խախտում են անմեղության կանխավարկածը՝ մարդկանց վանդակի մեջ ցուցադրելով։ Եվ հիշեցրեց արտերկրում հաստատված ավանդույթը, թե այնտեղ դատապարտյալների դեմքը ներկայացնում են գերազանցապես գծանկարների միջոցով՝ այն էլ, եթե իրենք չեն առարկում եւ համաձայն են։
