Երեկ, «Հայկական ժամանակ» օրաթերթի գլխավոր խմբագիր Նիկոլ Փաշինյանն, այնուամենայնիվ, դիմեց վճռաբեկ դատարանին։ Մինչդեռ կարող էր, չէ՞, սրբագրել մասնավորապես Սերժ Սարգսյանի պատվի եւ արժանապատվության դեմ գործած իր մեղքերը եւ մեկ առ մեկ հերքել։ Նախ, որ չպե՛տք է տարանջատվեն ՆԳ եւ ԱԱ նախարարությունները։ Պիտի հերքվեր Ռազմիկ Մարտիրոսյանի հարցազրույցը, որը դեմ էր տարանջատմանը եւ հերքվեր նաեւ Էդվարդ Եգորյանի հարցազրույցը, որը դրա կողմնակիցն էր։ Եվ վերջապես, որպես հերքում պիտի վճռականորեն հայտարարվեր, թե չի՛ կարելի կռել Սերժ Սարգսյանի քանդակն իր «Միցուբիշիի» յուղը փոխելիս։
ՎԱՏ ԼՈՒՐ
Փետրվարի 1-ից Հարություն Հարությունյանի փաստաբան Ժորա Խաչատրյանը հրաժարվել է Հարությունյանի պաշտպանությունից։ Մեր տվյալներով՝ փաստաբանից հրաժարվել էր ինքը՝ պաշտպանյալը։ «Առավոտի» խնդրանքին՝ ներկայացնել պաշտպանությունից հրաժարվելու մոտիվները, պրն Խաչատրյանն ասաց. «Ոչ մի բամբասանքի մի հավատացեք։ Ուղղակի անհրաժեշտ էր, որ ես չմասնակցեմ։ Դա իմ անձնական խնդիրն է, որը հրապարակման ենթակա չէ»։ Ճշտեցինք նաեւ, որ պաշտպանյալից պրն Խաչատրյանը հրաժարվել է Հարությունյանի հետ փոխադարձ համաձայնության գալով։ Վերջինիս պաշտպանությունը ստանձնած փաստաբան Ռուբեն Ռշտունին, սակայն, չի բացառում, որ Ժորա Խաչատրյանի «հրաժարականը» իր պաշտպանյալի հետ տարաձայնությունների հետեւանք է։
