Անցած շաբաթ վերջնականապես պարզվեց, որ այն շոշափելի գումարները, որոնցով Սփյուռքի դաշնակցականները պահում են իրենց հայաստանցի կուսակցական ընկերներին ու կառույցներին, ներդրումներ են Հայաստանի տնտեսության մեջ: Եվ դա ճիշտ է. այդպիսի ինվեստորներով Հայաստանը շատ մոտ ապագայում կդառնա միջազգային թմրաբիզնեսի բանուկ խաչմերուկ:
Արամ Սարգսյանը
Ազգային փրկության գործում իր խոշոր ներդրումն է կատարել նաեւ գլխավոր դեմոկրատը: Նա առաջարկել է նախագահին կից ստեղծել ազդեցիկ կուսակցություններից /օրինակ, ՀԴԿ-ից/ մի հանձնաժողով, որը օժտված կլինի արտակարգ լիազորություններով եւ ժողովրդին է վերադարձնելու ժողովրդից թալանած փողերը: Ճիշտ է, այդ փայլուն գաղափարը նոր չէ: Կարծես թե ժամանակին նման գործողությունը կոչվում էր թալանչիների թալան /կամ գիտականորեն՝ էքսպրոպրիատորների էքսպրոպրիացիա/: Հայտնի է նաեւ արտակարգ հանձնաժողովի անունը՝ ՉեԿա:
Կարդացեք նաև
Մի տնտեսագետ
Մեր թերթն ավելի գրավիչ դարձնելու գործում իր ներդրումը ցանկացավ անել տնտեսություն մի մասնագետ: «Առավոտի» այն հարցին, թե արժե՞ արդյոք թերթում տպագրել 2000 թվականի բյուջեի նախագծի հիմնադրույթները, նա պատասխանեց. «Իհարկե, արժե: Տպագրեք դրանք մաս առ մաս, ձեր թերթի վերջին էջում որպես հումոր»:
ԱՐԱՄ ԱԲՐԱՀԱՄՅԱՆ
