Մինչեւ վերջերս դրամաշնորհներ (գրանտներ) էին ստանում Հայաստանում գործող ոչ կառավարական կազմակերպությունները, որոնք, բնականաբար, շարժում էին հայրենի իշխանությունների բարի նախանձը։ Երեկ Սահմանադրական դատարանը քննության էր դրել ՀՀ եւ Միջազգային զարգացման ընկերակցությանն ուղղված դրամաշնորհի համաձայնագիրը, որը հաստատ հակառակ ազդեցությունը գործեց։
Ըստ այդ համաձայնագրի՝ մշակույթի, երիտասարդության եւ սպորտի նախարարությանը կտրվի 371.000 ԱՄՆ դոլար դրամաշնորհ։ Որքան էլ կատակով նկատենք, թե դրանց մի մասը կմսխվի խորհրդատվական կենտրոններ Գառնիի տաճարում կամ Գեղարդում ստեղծելու համար, այնուամենայնիվ, ակնհայտ է, որ մի մասը հաստատ կծախսվի տեխնիկական օգնության նպատակով։ Թեեւ կա նաեւ «մշակութային ժառանգության վայրերում առկա ապրանքանյութական պաշարների» նորացման խնդիրը եւս։
ՍԴ-ն երեկ քիչ էր մնում համաձայնագիրը ետ ուղարկեր բնագրային անհարթությունների, թարգմանության ցածր կուլտուրայի պատճառով։ Լեզուդ կոտրվում է, երբ կարդում ես. «Մշակութային ժառանգության վայրեր», «Ստացողի ինստիտուցիոնալ դաշտ», «Զբոսաշրջիկության փորձնական կիրառում» հար եւ նման բառակապակցություններ, որոնք առկա էին համաձայնագրում։
ՍԴ նախագահ Գ. Հարությունյանը, երբ հարցրեց նախագահի պաշտոնական ներկայացուցչին՝ Ռոլանդ Շառոյանին, թե «մշակութային ժառանգություն» ասելով կոնկրետ ո՞ր ոլորտը նկատի ունեն ֆինանսավորելու, պրն նախարարը պատասխանեց, թե՝ գրադարանային համակարգն ու թանգարանները։
Կարդացեք նաև
Ռ. Շառոյանի խոսքերով ներդրվելիք գումարն «արտակարգ իրավիճակների հիմնադրամ» է։ Նկատենք նաեւ, որ այս արտակարգ նշանակության գումարները ներդրողները «ավանդական» ծախսման ձեւերն էլ են ցույց տվել։ Օրինակ. «կազմակերպել դասընթացներ աշխատակիցների համար», «ստեղծել գործնական ձեռնարկ», «կատարել ներդրումներ մասնավոր սեկտորում եւ օգնել որոշելու ծրագրին մասնակցող մասնավոր ներդրողներին…»։
ՌՈՒԶԱՆ ՄԻՆԱՍՅԱՆ
