Այսօր ԵՊՀ իրավաբանական ֆակուլտետում կընթանան դատավորների պաշտոնեական պիտանիության ցուցակներում ընդգրկվելու համար անցկացվող քննությունները։ Այն անց է կացվում տարին մեկ անգամ։ Դատավորներն անփոխարինելի չեն եւ այս քննություններով, փաստորեն, հաղթած հավակնորդները հարկ եղած դեպքում կփոխարինեն նրանց (ցմահների՞ն…)։ «Քրեականների» (նկատի ունենք քրեական եւ քրեական դատավարության իրավունքների մասնագետներին) կարողությունների (ԱՆ բառամթերքից է- Ռ. Մ.) ստուգումը կտեւի 8 ժամ, «քաղաքացիականներինը» (քաղաքացիական դատավարության իրավունքների մասնագետները)~՝ 6 ժամ։ Հանձնաժողովը գլխավորում է արդարադատության նախարար Դ.Հարությունյանը։ Հանձնաժողովի կազմում են Հ. Դանիելյանը, Ֆ.Թոխյանը, Ա. Հարությունյանը ու Ա.Պետրոսյանը։
Ծրագրով սահմանվել է «ստուգման աշխատանքի նյութը», մասնավորապես պահանջվում է հավակնորդից երկնել մեկ քրեական կամ մեկ քաղաքացիական գործ (նախաքննությունն ու դատաքննությունն ավարտած)։ Հետաքրքիր կարող է լինել եւ ինչ-որ տեղ դժվար օրինակ, եթե նրանք մեղադրական եզրակացություն ձեռքներին չունենան, կարո՞ղ են մի վճիռ գոնե… երկնել։ Քննության ժամանակ հաշվի է առնվելու ոչ միայն իրավական գիտելիքների իմացությունը, այլ, ժողովուրդ, հայոց լեզվի տիրապետումը (35 եւ ավելի ուղղագրական սխալներով դատավճռի համար «Առավոտը» սիրով էջ կտրամադրի- Ռ.Մ.)։ Աշխատանքների ստուգման տեւողությունը 10 օր է։ Մենք մասնակցելու ենք քննություններին եւ քննասենյակներում կատարվող հետաքրքիր դեպքերին անմասն չենք թողնի ձեզ։
Ռ. Մ.
