Ճիշտ ժամանակին թռչելով այն գնացքից, որն իր իսկ նախորդ հայտարարությունների համաձայն, տանում էր դեպի կայունություն /Ռոբերտ Քոչարյանի՝ իր պաշտոնին մնալով/, ԱԺՄ նախագահը նստեց տրամագծորեն հակառակ ուղղությամբ ընթացող գնացքը, որն, ըստ իր վերջին հայտարարությունների, տանում է դեպի ճգնաժամի հանգուցալուծում /Ռոբերտ Քոչարյանի հրաժարականով/: Այդ հարցի քննարկման վերսկսումը, ինչ խոսք, չի ուժեղացնի մեր պատվիրակության դիրքերը հաջորդ շաբաթ սկսվող ԱՊՀ գագաթաժողովում:
Աշոտ Մանուչարյանը
Նմանատիպ հայտարարությամբ /նախագահ Քոչարյանի հրաժարականի անխուսափելիության մասին/ փոքր-ինչ ավելի մեղմ ձեւով հանդես եկավ «Ղարաբաղ» կոմիտեի մեկ այլ անդամ՝ Աշոտ Մանուչարյանը: Քաղաքական վետերանների այս միասնական տեսակետը վկայում է, որ ա/ նրանք մի բան գիտեն, բ/ Ռոբերտ Քոչարյանին եւ երկրապահներին «բարիշացնելու» պրն Մանուչարյանի ջանքերը առայժմ չեն հանգել իրենց տրամաբանական ավարտին:
Կարդացեք նաև
Վահան Հովհաննիսյանը
Շատ բազմանշանակ հայտարարություն արեց ՀՅԴ հայաստանյան ղեկավար Վահան Հովհաննիսյանը՝ «Ազատություն» ռադիոկայանին խոստովանելով, որ Հայաստանն այսօր ոչ ոք չի ղեկավարում: Չգիտես՝ ում մեղադրես դրանում: Բացառված չէ, որ ինքը՝ պրն Հովհաննիսյանը, ՀՀ նախագահի խորհրդականի պաշտոնը զբաղեցնելիս, բավականաչափ իմաստուն խորհուրդներ չէր տալիս՝ երկիրը ղեկավարելու ուղղությամբ: Հնարավոր է նաեւ, որ երկիրը չի ղեկավարում նաեւ առաջին իշխանությունը՝ խորհրդարանը, որտեղ դաշնակցությունը բավականին սոլիդ խմբակցություն ունի:
ԱՐԱՄ ԱԲՐԱՀԱՄՅԱՆ
