«ԵՐԿՐԱՊԱՀԸ»՝ ՎԱՂԸ, ՎԵՏԵՐԱՆՆԵՐԸ՝ ՓԵՏՐՎԱՐԻՆ ԼՂՀ «Երկրապահ» միությանն ի հակակշիռ ստեղծված «Արցախի պատերազմի վետերանների միության» Ստեփանակերտի քաղաքային կազմակերպությունն այսօր համաժողով է անցկացնելու։ Այս միությունը տարածքային նման կազմակերպական համաժողովներից հետո մտադիր է փետրվարին համագումար անցկացնել։ Ենթադրվում է, որ արցախյան պատերազմի վետերանների միությունը կգլխավորի ԼՂՀ պաշտպանության փոխնախարար Վիտալի Բալասանյանը։ ԲԱՑ ՆԱԽԱՔՆՆՈՒԹՅԱՆԸ ԴԵՄ ԵՆ ՆԱԵՎ ՓԱՍՏԱԲԱՆՆԵՐԸ Փաստաբանների միջազգային միության նախագահ Տիգրան Ջանոյանն «Ազատություն» ռ/կ-ին հոկտեմբերի 27-ի գործով հրապարակային նախաքննություն վարելու կոչերի առնչությամբ ասել է. «Ավելորդ հրապարակայնություն պահանջելով, մենք կարող ենք խանգարել այն փոքրիկ հույսին, որ յուրաքանչյուրս փայփայում է իր մեջ՝ թե իրոք կբացահայտվի ճշմարտությունը եւ վեր կհանվեն գործի բոլոր իրական հանգամանքները»։ ԽՈՐԵՆ ՇՈՅԳՈՒԵՎԻՉԻ ՀԱՂԹԱԿԱՆ ՆՎԵՐԸ Հայտնի ֆուտբոլիստ Խորեն Հովհաննիսյանը Սերգեյ Շոյգուի «Եդինստվո» կուսակցության ընտրարշավին է մասնակցել յուրահատուկ խաղով՝ ի թիվս խորհրդային տարիների առաջատար ֆուտբոլիստների (Օլեգ Բլոխին եւ այլն)։ Խ. Հովհաննիսյանը խաղում էր 14 համարի տակ։ Եվ 14 համարով համազգեստի լավագույն կեսը նվիրել է նախկին քաղաքապետ Վահագն Խաչատրյանին։ ԿՐԿԻՆ ՀԱՆՐԱՔՎԵ «Միասնություն» խմբակցությունը մտադիր է այս տարվա առաջին կեսին հանրաքվեի ներկայացնել երկրի Գլխավոր օրենքը՝ փոփոխություններով։ Սահմանադրական փոփոխությունների հարցի մասին մեր հարցազրույցը Անդրանիկ Մարգարյանի հետ՝ առաջիկա համարներից մեկում։
