Գրիպի ավստրալիական տեսակը Եվրոպայի վրայով, Ռուսաստանի կողմից, ամսվա վերջին կհայտնվի Հայաստանում։ Գրիպի վիրուսի հետ Հայաստան է ժամանելու նաեւ մենինգիտի կանադական տեսակը։ Ուրալի խոշոր քաղաքներն արդեն վարակված են ուղեղի բորբոքային այս հիվանդությամբ։ Ամեն տեսակի դժվարությունների իմունիտետ ձեռք բերած հայաստանցիներին համաշխարհային (գրեթե) այս համաճարակը կարծես թե չի անհանգստացնում։ Առողջապահության նախարարությունը սովորական ձմեռային հերթապահ ասուլիսն է հրավիրում եւ գլխավոր համաճարակաբանը շատ հանգիստ խորհուրդ է տալիս իրար չխառնվել, ձեռքերը հաճախակի լվանալ, չհամբուրվել, իսկ նրանք, ովքեր ֆինանսական հնարավորություններ ունեն՝ պատվաստվեն գրիպի դեմ։
Իրականում, գրիպի ցանկացած պատվաստում ամենաքիչը մեկ ամիս առաջ պետք է արվի, արդյունավետ լինելու համար։ Բայց գրիպի վիրուսը, հայ-հայ, մինչեւ ամսվա վերջ կժամանի Հայաստան։ Դպրոցներում ցուրտ է, աշակերտների մեծ մասը՝ թերսնված։ Իսկական պարարտ հող՝ ավստրալիական գրիպի համար։ Իշխանություններն ի զօրու չեն անմիջապես տաքացնել դպրոցները եւ կշտացնել թերսնվածներին։ Մնում է շտապ այլ միջոցներ ձեռնարկել գրիպի դեմն առնելու համար, թե չէ գրիպն ինքը մեր դեմ միջոցառումներ կիրականացնի։
Մ. Ե.
