Հայ նշանավոր մահափորձվածների՝ Պարույր Հայրիկյանի, Կիմ Բալայանի, Արամ Հարությունյանի շարքերը համալրել է Գրողների միության քարտուղար պրն Ափինյանը: Սույն Ապիկարը, որը նախորդ ռեժիմի ժամանակ նույնպես գտնվում էր իշխանության համապատասխան տեղում, այսօր արագորեն վերակառուցվել է եւ հայտարարում է, որ իր դեմ մահափորձ էր կատարել… Հրանտ Մաթեւոսյանը՝ իր, Ապիկարի, գրական հանճարի նկատմամբ նախանձից դրդված: Ով լինի՝ չնախանձի նման Ապիկարի:
Վարդան Օսկանյանը
Անցած շաբաթ արտգործնախարարը 99 թվականի իր դիվանագիտական հաջողությունների մասին պատմեց բոլոր լրագրողներին, բացի «Առավոտի» թղթակցից: Եվ դա բնական է. Ստամբուլում տարած իր փայլուն սրբագրական հաղթանակից հետո մութ ուժերը կարող էին նրանից վրեժխնդիր լինել: Եթե «Առավոտի» որեւէ թղթակից, ասենք, Լիլիթ Ավագյանը, ահաբեկեր նրան, էլ ով է հաջորդ իշխանության ժամանակ սրբագրելու Ստամբուլի անցանկալի հետեւանքները:
Կարդացեք նաև
Էդուարդ Շեւարդնաձեն
Վրաստանի ԿԳԲ-ի նախկին ղեկավարը անցած շաբաթ վերջնականապես որոշեց նոր հազարամյակում եւս մի քանի տարի ղեկավարել հարեւան երկիրը: 71-ամյա բատոնո Էդիկի քաղաքական երկարակեցության պատճառը շատ պարզունակ է. տարին առնվազն մեկ անգամ նա հայտնաբերում է իր դեմ կազմակերպած հերթական մահափորձը եւ պետական հեղաշրջումը, որի պատրվակով էլ հաճախակի փոխում է ուժային նախարարներին: Արդյունքում՝ վերջիններս իսկապես չեն հասցնում դավադրություն կազմակերպել:
ԱՐԱՄ ԱԲՐԱՀԱՄՅԱՆ
