Հայ էներգետիկները երեկ նշեցին իրենց մասնագիտական տոնը՝ էներգետիկի օրը։ Ժողովուրդն այս ոլորտի աշխատակիցներին շնորհավորական բացիկներ չուղարկեց, սակայն իր ձեւով շնորհավորեց նրանց. երեկ՝ դեկտեմբերի 22-ին, տարվա ամենաերկար գիշերն էր, հետեւաբար նաեւ այդ գիշեր մարդիկ ծախսեցին ավելի շատ էլեկտրաէներգիա։ Ավելի ծանրակշիռ նվեր մենք անել չենք խոստանում։
ՎԱՏ ԼՈՒՐ
Երկուշաբթի օրվանից Փարիզի «Շառլ դը Գոլ» օդանավակայանում կալանվել է «Հայկական ավիաուղիներին» պատկանող ԻԼ-86 ինքնաթիռը, որը կատարել էր Երեւան-Փարիզ չվերթը։ Պատճառները ճշտելու համար դիմեցինք ՀԱՈՒ-ի լրատվական ծառայության ղեկավար Թամարա Սարգսյանին, որը պատասխանեց. «Կալանման պատճառը Արեւմտյան Եվրոպայում եւ Մերձավոր Արեւելքում «Հայկական ավիաուղիների» ավիավառելիքի նախկին մատակարար «Ֆենիքս Ֆյուլ» կազմակերպության եւ ՀԱՈՒ-ի միջեւ ֆինանսական տարաձայնություններն են, որոնք մոտ օրերս կպարզվեն»։
