«Առավոտը» փորձեց Ալբերտ Բազեյանից ճշտել, թե ԵԿՄ 4-րդ համագումարում իր զեկուցումը՝ նախագահի եւ իրավապահ մարմինների քննադատությամբ, համահո՞ւնչ էր իր տեսակետներին, թե՞, ինչպես Սերժ Սարգսյանն էր գնահատել, այն «կոլեկտիվ ելույթ» էր. «Դրանք վարչության ընդհանուր տեսակետներն էին, որի կազմում նաեւ ես եմ: Այնպես որ, ես ելույթի մեջ ասել եմ այն, ինչին համամիտ եմ եղել»։
ՎԵՐԱԴԱՐՁ
Հաջողությամբ հաղթահարելով աչքի բարդ վիրահատությունը, այսօր Մոսկվայից Երեւան է վերադառնալու ԱԺ պատգամավոր Անդրանիկ Մանուկյանը։ Սակայն վնասված է նաեւ պրն Մանուկյանի առողջ աչքի դիմային նյարդը։ Այս խնդրի շուրջ նա պատրաստվում է վաղը խորհրդակցել միկրովիրաբույժ Արտավազդ Սահակյանի հետ։
Կարդացեք նաև
Ի դեպ, այսօր լրանալու է պրն Մանուկյանի ծննդյան 46-ամյակը, ինչի առիթով «Առավոտը» նրան սրտանց շնորհավորում է։
ԼԱՎ ՆԱԽԱՁԵՌՆՈՒԹՅՈՒՆԸ «ՄԻԿԱՅԻՆԸ» ՉԷՐ
«Առավոտը» «Հայկական ժամանակ» օրաթերթի գլխավոր խմբագիր Նիկոլ Փաշինյանից փորձեց պարզել, թե արդյոք «Օրագրից» 25 հազար դոլար ստանալու գործընթացը դադարեցվել է «Միկա-Արմենիայի» ղեկավար Միքայել Բաղդասարո՞վի նախաձեռնությամբ։ Պարզվեց, որ դա այնուամենայնիվ արդարադատության նախարարության դատական ակտերի հարկադիր ծառայության որոշումն էր։ Ինչեւէ, այժմ «Օրագրի» հաշիվներն ապասառեցված են։ Սակայն Նիկոլ Փաշինյանը մտադիր է պահպանել թերթի «Հայկական ժամանակ» անվանումը, այլ ոչ թե այն նորից «Օրագիր» կոչել։
ԱՅԼԵՎՍ ՁԵՐԲԱԿԱԼՎԱԾ ՉԷ
«Առավոտին» հայտնի դարձավ, որ «Հայկական ավիաուղիների» փոխտնօրեն Արտյուշա Սիմոնյանն ազատության մեջ է։
