Հայտնի է, որ ՀԺԿ-ն ԱԺ նախագահ Արմեն Խաչատրյանից պահանջել էր հանձնել իր գերմանական BMW-ն եւ դրա փոխարեն ձեռք բերել տեղական արտադրության մի զրահապատ մեքենա։ Հայրենի խորհրդարանին իր կուսակցության առջեւ սեւերես չանելու համար կառավարությունը որոշել է զրահապատ ԵրԱԶ-ների արտադրություն սկսել։ Իսկ եթե լուրջ՝ այս առիթով նշենք, թե այնքան էլ լավ չէ, որ Արմեն Խաչատրյանն ԱԺ նիստում անմիջապես չանդրադարձավ մեքենայի վերաբերյալ պատգամավորի հարցին եւ պոստֆակտում պարզաբանումներ տվեց ԱԺ հասարակայնության հետ կապերի վարչության միջոցով, որն էլ գրեթե ոչնչից այսքան մեծ աղմուկի պատճառ դարձավ։
ՎԱՏ ԼՈՒՐ
Տնտեսագետ, ՀՅԴ անդամ Թաթուլ Մանասերյանի՝ Ռեդլանդսի համալսարանի պրոֆեսոր ներկայանալը, թերեւս, որոշ մարդկանց նյարդերը շատ էր սղոցել։ Եվ նրանք «Առավոտին» փոխանցեցին նույն համալսարանի մենեջմենտի եւ բիզնեսի բաժանմունքի պրոֆեսոր Ջեյմս Փիքի՝ էլեկտրոնային փոստով ուղարկված պարզաբանման պատճենը. «Թաթուլ Մանասերյանը 1993-1997-ին սովորել է Ռեդլանդսի համալսարանի մենեջմենտի եւ բիզնեսի բաժանմունքում։ Նա աշխատում էր կես դրույքով եւ բաժանմունքում օգնական էր։ Նա գիտական աստիճան ունի՝ տրված Երեւանի համալսարանից»։
Կարդացեք նաև
