Արդեն երկրորդ անգամ է, որ պաշտոնական «ագիտպրոպը» ենթադրություններ է անում, թե «Առավոտում» տպագրվող նյութերը ստորագրվում են կեղծանուններով։ Այս անգամ կասկածներն ընկան «Գայանե Բաղդասարյան» ստորագրության վրա։ Հաճույքով ներկայացնում ենք մեր հեղինակին։ Գայանեն 42 տարեկան է, ավարտել է համալսարանի ռադիոֆիզիկայի ֆակուլտետը, ներկայումս աշխատում է Մաթեմատիկական մեքենաների ինստիտուտում որպես լաբորատորիայի վարիչ։ 92 թվականից թղթակցում է «Գոլոս Արմենիի» եւ «Առավոտ» թերթերին։
ՎԱՏ ԼՈՒՐ
Հանրահայտ է Վազգեն Սարգսյանի այն խոստովանությունը, թե Վանոն իր ընկերն է։ Այսօր, վերջինիս նամակում այս տողի առնչությամբ՝ «Քանի մարդ է մնացել մեզ պաշտպանող», մի ընկերոջը մյուսից պաշտպանելու գործին է լծվել «Իրավունքը» («Վանոն փորձում է ինքն իրեն նույնացնել Վազգեն Սարգսյանի հետ»)։ Իսկ «ԻՄ» դաշինքը Վազգեն Սարգսյանի եւ Սամվել Բաբայանի փոխհարաբերությունների վատացման պատճառ էր դարձել։ Մյուս «պաշտպանողը» Վահան Հովհաննիսյանն է («Նրա հիշատակի վրա ստվեր են գցելու»)։ Իսկ «31»-ի գործով մեղադրական եզրակացության մեջ Վազգեն Սարգսյանին սպանելու ծրագրի մասին էր հիշատակված։ Եվ վերջապես, վերջին «պաշտպանողը» «Օրակարգ» ծրագիրն է, որի վարողի նկատմամբ Վազգեն Սարգսյանը, մեղմ ասած, բարեհաճ վերաբերմունք չուներ։
