Երբ տարատեսակ մեկնաբանությունների տեղիք տված ցուցակը, որ հոկտեմբերի 27-ին ժամը 22.30-ին ներկայացվել էր Ռոբերտ Քոչարյանին՝ չարաբաստիկ անվանեցինք, Վահան Շիրխանյանը, որի անունն այդ ցուցակում նշված էր որպես վարչապետի թեկնածու, այսպես արձագանքեց. «Այդ չարաբաստիկ ցուցակը, ես կասեի, որ փրկեց քաղաքը՝ կոպիտ ասած։ Իհարկե, զորքը քաղաքի վրա չէր գա, բայց հնարավոր էին այլ զարգացումներ»։ Վահան Շիրխանյանը նաեւ պատմեց, թե Ռոբերտ Քոչարյանն այդ ցուցակը ներկայացնողներին ասել էր. «Եթե սա չլիներ՝ ես իրեն նշանակելու էի վարչապետի ժամանակավոր պաշտոնակատար»։ Եվ նախագահին շրջապատողները վկայել էին, որ նա իրոք փնտրել էր Շիրխանյանին այդ նշանակումն իրականացնելու համար։
Վահան Շիրխանյանի հարցազրույցը կարդացեք 3-րդ էջում։
ՍՊԱՌՆԱԼԻՔՆԵՐ ԳԵՆԵՐԱԼԻՆ
Կարդացեք նաև
«Առավոտի» ունեցած տեղեկություններով, հոկտեմբերի 28-ին սպառնալից հեռախոսազանգեր են հնչել գեներալ Մանվել Գրիգորյանի տանը։ Նրա որդուն ասել են. «Հորդ էլ ենք Վազգեն Սարգսյանի օրը գցելու»։
Սպառնալիքները շարունակվել են նաեւ հաջորդ օրերին։
ՆԱԽԱԳԱՀԻ ՀԵՏ ՀԱՄԱՁԱՅՆԵՑՎԱԾ ԷՐ
«Առավոտին» հայտնի դարձավ, որ հոկտեմբերի 27-ին, երբ պաշտպանության նախարար Վաղարշակ Հարությունյանը ժ. 17.30-ին Գորիսից զանգել է Ռոբերտ Քոչարյանին՝ նրա հետ պայմանավորվել է զորքեր մտցնելու մասին։ Ասվել է, թե կարելի է հատուկ նշանակության գունդը մտցնել, որ 1000-1500 զինվորականներ են։ Ընդ որում, նրանք միայն ավտոմատներով չեն զինված, այլ ունեն լուրջ տեխնիկա։
ՕՐԵՆՔԻ ՉԻՄԱՑՈՒԹՅՈՒՆ
Նիկոլ Փաշինյանի երեկ շարունակված դատաքննության ընթացքում ավարտվեց վկաների հարցաքննությունը եւ սկսվեց տուժողների հարցաքննությունը։ Առաջինն Անուշ Պլուզյանն էր՝ Արտաշես Գեղամյանի կինը։ Երբ Նիկոլ Փաշինյանը նրան հարցրեց, թե ինչու մամուլի մասին օրենքի համաձայն՝ «Օրագրից» հերքում չի պահանջել իրեն վերաբերող հրապարակման համար, տիկին Պլուզյանը մասնավորապես պատասխանեց, թե պարտավոր չէր այդ թերթին դիմել եւ իրենք հերքումը տարածել են «Սնարք» եւ «Նոյյան տապան» գործակալությունների միջոցով։ Նիկոլ Փաշինյանը պարզաբանեց, թե «Օրագիրը» երբեք այդ գործակալությունների բաժանորդը չի եղել։
