Մուշեղ Մովսիսյանը, որն այժմ հոկտեմբերի 27-ի արյունալի սպանդը կազմակերպելու մեջ է մեղադրվում, ԱԺ 6 անկախ պատգամավորների հետ նախապես հայտարարություն էր արել, թե կնպաստեն ԱԺ ղեկավարության եւ կառավարության ձեւավորման գործին՝ «հույսով, որ վերջիններս կշարունակեն Կարեն Դեմիրճյանի եւ Վազգեն Սարգսյանի քաղաքական գիծը»։ Այս հայտարարության մեջ նաեւ նշվում է. «Դատապարտում ենք հասարակության կողմից մերժված, տնտեսությունը քայքայած, հանրապետության բնակչությունը բարոյահոգեբանական ծանր վիճակի հասցրած եւ իրենց վարկաբեկած ուժերի վերակենդանացման փորձերը»։
ՉՇԱՀԱՐԿԵՔ
ԱԺ փոխնախագահ Տիգրան Թորոսյանն «Առավոտին» փոխանցեց, որ ԵԽ-ում Հայաստանի հարցով զեկուցող Դմիտրիո Վոլչիչը գոհունակություն է արտահայտել, որ հոկտեմբերի 27-ի իրադարձություններից հետո բանակն իրեն հանգիստ ու զուսպ է պահել եւ չի խառնվել քաղաքական գործընթացներին։
Կարդացեք նաև
ՀՅԴ խմբակցության քարտուղար Ռուբեն Հակոբյանն էլ նշեց, որ իրենք պարոն Վոլչիչին ասել են, թե հոկտեմբերի 27-ի իրադարձություններն արտաքին աշխարհում չպետք է դառնան շահարկման առարկա, եւ չպիտի ազդեն ազգի նկարագրի վրա։
ԴՈՒ ՎՐԱՑԻ ՉԵՍ, ՖՐԱՆԿ ԵՍ
Առավել քան անփառունակ ավարտվեց Հռոմի Պապ Հովհաննես Պողոս Երկրորդի այցը Վրաստան։ Թբիլիսիի մարզապալատում նրա մատուցած պատարագին հրաժարվել են մասնակցել վրաց ուղղափառ եկեղեցու ներկայացուցիչները։ Նրանք վախ են արտահայտել, որ Հռոմի Պապի այցը կարող է վնասել վրաց ուղղափառ ուսմունքին։ Սակայն, որպես քաղաքական իրադարձություն, սա շատ անպատվաբեր է Վրաստանի ղեկավարության համար։
