Նոյեմբերի 5-ին Հայաստանի Գրողների տանը հավաքված մտավորականները հայտարարություն էին ընդունել, ըստ որի, մասնավորապես, «պետական կառավարման ձեւերի ապազգային եւ ճկուն չլինելը… առաջացրել է բարոյահոգեւոր աննախադեպ անկում»։ Հուսանք, որ հայտարարությունից հետո այդ «ձեւերը» ապազգային եւ ճկուն կդառնան։ Որպես ելք առաջարկվում է նախագահի ապարատին կից ստեղծել գիտավերլուծական կենտրոններ, «որտեղ կկարեւորվի ժողովրդի եւ մտավորականության հետ ներքեւից վերեւ ուղիղ եւ հետադարձ կապը իշխանությունների հետ»։ Ուրախալի է, որ նույնիսկ այս ծանր վիճակում մտավորականությունը շարունակում է չափազանց հոդաբաշխ ձեւով արտահայտել իր մտքերը եւ չի կորցրել իշխանություններից պաշտոններ մուրալու իր ունակությունը։
ՎԱՏ ԼՈՒՐ
Ռուսաստանի Պետդումայի ընտրություններին կփորձի մասնակցել այն անձնավորությունը, որը ժամանակին փորձեց սպանել Միխայիլ Գորբաչովին։ ԽՍՀՄ նախագահի թիկնապահներին հաջողվեց անհաջողակ ահաբեկիչի ձեռքից խլել զենքը։ Այս իրադարձությանը հետեւած դատաբժշկական փորձագետները ահաբեկչին ճանաչեցին անմեղսագիտակ եւ մի քանի տարի հոգեբուժարանում պահելուց հետո «բաց թողեցին մարդամեջ»։ Եթե հաշվի առնենք, որ հայերն ամեն ինչում փորձում են նմանակել ռուսներին, ապա արդեն կարելի է պատկերացում կազմել, թե ովքեր են մասնակցելու հաջորդ խորհրդարանական ընտրություններին՝ թեկնածուի կարգավիճակով։
Կարդացեք նաև
Հիշեցնենք, որ ինքը՝ Յոզեֆ Շվեյկն, էր ասում. «Եթե քեզ մի անգամ մասնագետները ապուշ են ճանաչել, դա արդեն ողջ կյանքում պետք կգա»։
