Ըստ ԼՂՀ ԱԳ նախարարի՝ նոյեմբերին Ստամբուլում կայանալիք գագաթնաժողովի (եւ նման ժողովների նշանակությունն առհասարակ) պետք չէ գերագնահատել։ «Պետք է հիշել, որ ցանկացած խնդիր լուծվում է երկրի ներսում։ Որքանով ինձ հայտնի է, մինչեւ հիմա այն մեծ փաստաթուղթը, որը պետք է համաձայնեցվի եւ ընդունվի Ստամբուլի գագաթնաժողովում, մինչեւ օրս համաձայնեցված չէ»։
ԶԻՆԱԴԱԴԱՐ
ՊՆ-ին մերձ աղբյուրներն «Առավոտին» հայտնեցին, որ Ռոբերտ Քոչարյանին հոկտեմբերի 27-ի գիշերը ներկայացված ցուցակի շարժառիթները միայն այն էին, որ հրամկազմը նախ անմիջապես կատարվածն ընկալել էր որպես դավադրություն Վազգեն Սարգսյանի դեմ։ Եվ հետո, անվստահություն կար ուժային նախարարների եւ նախադեպերը հաշվի առնելով՝ կատարվածը բացահայտելու Գլխավոր դատախազի ցանկության նկատմամբ։ Եվ վստահելի պաշտոնյաների նշանակումը գուցե կանխեր զորքի տեղաշարժը։
Կարդացեք նաև
Ի դեպ, մեզ հայտնեցին նաեւ, որ այժմ էլ դադարը պայմանավորված է միայն սպասումով՝ արդյոք նոր կառավարության մեջ տեղ կգտնի Սերժ Սարգսյանը եւ իր պաշտոնում կմնա Աղվան Հովսեփյանը։
ՈՉ ՄԻԱՅՆ «ՀԱՑԻՎ»
Հոկտեմբերի 27-ին, 22.30-ի սահմաններում ՀՀ նախագահ Ռ.Քոչարյանին ներկայացված 5 հոգու ցուցակում (տարբեր պաշտոնների նշանակելու համար) որպես ՆԳ նախարարի թեկնածու նշվել էր Մուրադ Կիրակոսյանի անունը։
ՍՊԱՆՎԱԾԸ ԿԻՆ Է
Հոկտեմբերի 28-ին, առավոտյան ժ. 9.30-10.00-ի սահմաններում ՆԳ քննչական վարչության շենքում կրակոց լսվեց։ Մինչեւ երեկ շշուկներ էին պտտվում, թե սպանվել է մի կին, որը կասկածյալ է եղել։ Հավաստի աղբյուրներից տեղեկացանք, որ այո, սպանվել է կին՝ քննիչ Արմեն Սողոմոնյանի աշխատասենյակում։ Վերջինիս մտերմուհին էր եւ, ըստ նախնական վարկածի, զոհ է դարձել անզգուշորեն արձակված գնդակի…
ԲԱԿԼԱՆ ԻՄՆ Է՝ ԽԱՇԱԾ ԵՄ ՑԱՆՈՒՄ
Թմրադեղերը հին բլանկներով դուրս են գրվում այնքան ժամանակ, մինչեւ առողջապահության նախարարը հետին ամսաթվով օրինականացնի կատարվող ապօրինությունը։
ՍՏՈՒԳՈՒՄՆԵՐԸ ՈՉ ՄԻ ԿԱՊ ՉՈՒՆԵՆ
Մի քանի ամիս առաջ ՀԱՀ-ում հարկային տեսչությունը ստուգումներ էր անցկացնում։ Գործադիր տնօրեն Տիգրան Նաղդալյանից ուզեցինք ճշտել, թե ի՞նչ արդյունք տվեցին այդ ստուգումները. «Պլանային, տարեկան ստուգման մասին էր խոսքը։ Մեզ համար միանշանակ էր, որ այն փուլը, որ վերաբերում է իմ պաշտոնավարման շրջանին, ամեն ինչ նորմալ է»։
ԱՌԱՋԻՆ ՀԱՐՍԱՆԻՔԸ
Երեքշաբթի Երեւանում տեղի ունեցավ վերջին օրերի առաջին հարսանիքը։ Չկար միայն երաժշտություն, սակայն մեքենաները տոնական հանդերձով էին։ Հարսանիքը, որը տեղի է ունեցել Մալաթիա-Սեբաստիա համայնքում, նախատեսված էր շաբաթ օրը, բայց հետաձգվել է հայտնի իրադարձությունների կապակցությամբ։
Սեփ. լր.
