Փաստաբան Հովհաննես Ասրյանն «Ազատություն» ռ/կ-ին տված հարցազրույցում ասել է, որ ամենեւին էլ Սահմանադրությանը չի համապատասխանում, որ Ազգային ժողովում հոկտեմբերի 27-ին տեղի ունեցած ահաբեկչության գործը գտնվում է զինվորական դատախազության վարույթում։ Հովհաննես Ասրյանն ասել է, որ զինվորական դատախազությունը պետք է քննի այնպիսի գործեր, որոնք առնչվում են զինվորականներին։ Իսկ տվյալ դեպքում՝ որեւէ կողմում զինվորական չկա։ Ուրախալի է, որ Հայաստանում այսքանից հետո մնացել են մարդիկ, որոնք համարձակվում են խոսել օրենքի եւ ոչ թե՝ ազգային-ազատագրական պայքարի նպատակահարմարության մասին։
ՎԱՏ ԼՈՒՐ
Ադրբեջանի ընդդիմադիր գործիչ Ալի Քերիմովը հայտարարել է, որ իրենց տեղեկություններով Հեյդար Ալիեւը Ստամբուլում պետք է ստորագրի մի փաստաթուղթ, որով համաձայնում է Հայաստանին զիջել ոչ միայն Շուշին ու Լաչինը, այլեւ Քելբաջարը։ Ալի Քերիմովն ասել է, որ դա կանխելու համար ադրբեջանական ընդդիմությունը պատրաստ է սկսել պատերազմական գործողությունները։ Դիտորդների կարծիքով նման հայտարարություններն արվում են, որպեսզի Ստամբուլում Հեյդար Ալիեւը կարողանա փաստել, թե իբր երկրի ներսում գործում է կոշտ հակազդեցության պայմաններում։ Ցավոք, նման բան չի կարողանա փաստել Ռոբերտ Քոչարյանը։
