ՆԳ նախարար Սուրեն Աբրահամյանն «Առավոտին» հայտնեց, որ հանրապետության նախագահը դեռ իր հրաժարականը չի ընդունել։ «Արդյո՞ք իր հրաժարականը պայմանավորված է պաշտպանության նախարարության հայտարարության պահանջով» հարցին, Սուրեն Աբրահամյանը պատասխանեց՝ ոչ։ «Անբարոյական կլիներ անմիջապես հրաժարական տալը, քանի դեռ ներսում կային պատանդներ։ Սակայն ես որոշեցի նրանց ազատ արձակվելուն պես ներկայացնել հրաժարական»։
ԲԱԴԱԼՅԱՆԸ ՊՆ-ՈՒՄ ՉԻ ԵՂԵԼ
Հայկոմկուսի առաջին քարտուղար Սերգեյ Բադալյանն «Առավոտին» ասաց, որ ինքը չի մասնակցել ՊՆ-ում տեղի ունեցած ժողովին, ինչի մասին վկայություն է տվել հոկտեմբերի 29-ի մամուլը։ Պարոն Բադալյանի մատուցմամբ՝ ինքը մասնակցել է նախագահի նստավայրում տեղի ունեցած խորհրդակցությանը։
Կարդացեք նաև
ՄԵՂԱԴՐԱՆՔԸ 4 ՕՐՎԱ ԸՆԹԱՑՔՈՒՄ
Հաղորդվել է արդեն, որ քրեական օրենսգրքի 61-րդ հոդվածով հարուցվել է քրեական գործ՝ Ազգային ժողովում տեղի ունեցածի կապակցությամբ։ «Ազատություն» ռադիոկայանի հաղորդման համաձայն, գլխավոր դատախազության մամլո ծառայության ղեկավար Գուրգեն Ամբարյանն ասել է, որ մեղադրանքը ներկայացվելու է չորս օրվա ընթացքում։
ԱԴՐԲԵՋԱՆԱԿԱՆ ՄՈՏԵՑՈՒՄ
«Ազատություն» ռադիոկայանը հաղորդել է, որ Ադրբեջանի քաղաքական շրջանակներում հայտնի գործիչ Ուրուջ Մամեդովն առաջարկել է կազմել պատվիրակություն, որը կմասնակցի Հայաստանի Ազգային ժողովի նախագահի եւ վարչապետի հուղարկավորման արարողությանը, սակայն նրա առաջարկությունը մյուս գործիչների շրջանում միայն ժպիտ է առաջացրել։
