ՌԴ նախկին գլխավոր դատախազ Յուրի Սկուրատովի relax-ը միաժամանակ երկու թեթեւաբարո աղջիկների հետ, առանց լուրջ մոնտաժի ցուցադրվեց OPT-ով։ Հասարակ մարդկանց համար այնքան էլ հեշտ չէր հաղթահարել անհարմարության զգացումը՝ էկրանին տեսնելով լրիվ մերկ եւ այդքան ինտիմ գործով զբաղվող գլխավոր դատախազին։ Հետաքրքիր կլիներ իմանալ, թե Հայաստանի քաղաքացիներն ինչ կերպ կարձագանքեին՝ իրենց երկրի որեւէ պաշտոնյայի Ադամի հագուստով էկրանին տեսնելով։ Մենք մի փոքր հարցում անցկացրինք լրագրողական շրջանակում եւ պարզեցինք, որ հարցման մասնակիցներից եւ ոչ մեկը կասկած չունի, որ «մերոնք» ոչ պակաս ակտիվ են իրենց հանգիստը թեթեւ վարքի տեր կանանց անմիջական ընկերակցությամբ կազմակերպելու գործում։ Այդ հարաբերությունները հասարակության դատին հանձնելու նպատակահարմարություն ո՛չ գաղտնի գործակալությունները, ո՛չ էլ «շահագրգիռ այլ անձինք» առայժմ չունեն։ Սակայն անհրաժեշտության դեպքում մեր «մեծերին» վարկաբեկելու համար էլ հարմար նյութ՝ որքան ուզեք։
Մեր քաղաքական եւ հասարակական ակտիվիստները՝ ի տարբերություն Ռուսաստանի կամ ԱՄՆ-ի, միայն տեղական հետաքրքրություն են ներկայացնում։ Իսկ նրանց ինտիմ կյանքը ներկայացնելով՝ շատ-շատ կինը երեխաներին վերցնի եւ գնա «հորանց տուն»։ Ընդամենը։ Հիշենք, որ նման փորձ մեզ մոտ արդեն եղել է. ժամանակին հայ հեռուստադիտողի դատին ներկայացվեց Սերժ Ջիլավյանի պարը՝ սեղանի վրա, աղջիկների ընկերակցությամբ, ապա՝ Արշալույս գյուղի «հայտնի քեֆը»՝ Վազգեն Սարգսյանի, Արամ Ասատրյանի մասնակցությամբ։ Սակայն, ինքներդ էլ կարող եք համոզվել, որ սրան-նրան վարկաբեկելու համար նման տեսանյութերը լուրջ հիմք չեն. Վազգեն Սարգսյանն այժմ ՀՀ վարչապետ է, Արամ Ասատրյանն, ասում են, ԱՄՆ-ում հաջող գործ է անում։
ԼԻԼԻԹ ԱՎԱԳՅԱՆ
