Փախուստի մեջ է գտնվում «Դվին» հյուրանոցի տնօրեն Վանուշ Թորոսյանը, որն անցած խորհրդարանական ընտրություններում առաջ էր քաշել իր թեկնածությունը։ Չստանալով պատգամավորի բաղձալի մանդատը, նա այժմ փնտրվում է ՆԳ մարմինների կողմից։ Լավ է, որ նա ձեռք չբերեց պատգամավորի կարգավիճակ, թե չէ մյուս քրեականացված երեսփոխանների նման ճառեր կարտասաներ հայրենասիրության եւ բարոյականության մասին։
ՎԱՏ ԼՈՒՐ
Կարեն Դեմիրճյանի դարակազմիկ այցելությունը Ռուսաստան տալիս է իր առաջին արդյունքները։ Երեկվանից Ռուսաստանը դադարեցրել է Հայաստանի եւ Վրաստանի գազամատակարարումը՝ այդ երկրների պարտքի պատճառով։ Մասնավորապես, Հայաստանը պարտք է 15 մլն դոլար։ Անջատման պատճառով դադարեցվել է որոշ արդյունաբերական ձեռնարկությունների գազամատակարարումը, այդ թվում՝ այն ձեռնարկությունների, որոնք գազի համար պարտքեր չունեն։ Հավանաբար դա նկատի ուներ Կարեն Սերոբիչը, երբ ասում էր, որ Հայաստանի եւ Ռուսաստանի քաղաքական հարաբերությունները առաջ են ընկել, իսկ տնտեսականը՝ հետ մնացել։
