Պարզվում է, ազգային արտադրության վերելքի մեծագույն ջատագով, նույնիսկ՝ խորհրդանիշ դարձած Կարեն Սերոբիչը իր ղեկավարած պատվիրակության հետ Մոսկվա է թռել «Աերոֆլոտի» ինքնաթիռով։ Առայժմ դժվար է պարզել՝ դա ռուսների նկատմամբ բարիդրացիական գործողությո՞ւն է եղել, ԽՍՀՄ-ի ժամանակների կարոտախտի դրսեւորո՞ւմ, թե՞ ունեցել է այլ պատճառներ։ Սակայն ակնհայտ է, որ բավական մեծ պատվիրակության տոմսերի համար պատկառելի գումարներ մեր բյուջեից փոխանցվել են «մեծ եղբոր» բյուջեին։
ԽՈԶՈՒԿԸ ԶՈՐԱՄԱՍՈՒՄ
Կարդացեք նաև
«Առավոտին» հասած ինֆորմացիայի համաձայն՝ Արմավիրի մարզի զորամասերից մեկում տասնհինգ զինվոր խոզուկ են ընկել։ ՀՀ պաշտպանության նախարարության բուժվարչության պետ պրն Նազարեթյանից լուրի իսկությունը ճշտել երեկ չհաջողվեց, քանի որ նա մեկնել էր Արմավիր։
Վաղվա «Առավոտում» այս թեմային առավել մանրամասն կանդրադառնանք։
ԻՍԿ Ո՞ՆՑ ԷՐ ԷՆ ԺԱՄԱՆԱԿ
Մեր թերթի հոկտեմբերի 16-ի համարում տպագրված «Զորակցություն ընդդիմությունից» լուրի կապակցությամբ ԱԺ պատգամավոր Գագիկ Կոստանդյանը նախ ասաց.
– Ես պատիվ կհամարեի «Իրավունք եւ միաբանություն» խմբակցության մեջ լինել, բայց ես վերցրել եմ սկզբունք՝ ոչ մի խմբակցության եւ ոչ մի կուսակցության անդամ չլինել։
– Կոմունի՞ստ էլ չեք եղել։
– Կոմունիստ մի քանի ամիս եղել եմ։ Գիտեք՝ էն ժամանակ ոնց էր։
ԱՌԱՐԿԵՔ ԲԱՐՁՐԱԽՈՍԻՑ, ՈՐ ԼՐԱԳՐՈՂՆԵՐՆ ԷԼ ԼՍԵՆ
ԱԺ պատգամավոր, կոմունիստ Նորիկ Պետրոսյանն արձագանքելով «Առավոտի» մի հրապարակմանը, արդարացել է, թե Գեղարքունիքի փոխմարզպետի հետ հարցերը լուծելու վարչապետի խորհրդից հետո սուսուփուս տեղը չի նստել (ինչպես մենք էինք նշել), այլ առարկել է. «Երկու վարչապետներով մեկ տարի է հարցը չեք լուծում, ի՞նչ կարող էր անել շաբաթներ առաջ աշխատանքի նշանակված փոխմարզպետը»։
