Շաբաթ օրը ՍԴ-ում քննության դրվեց ՀՀ նախագահ Ռ. Քոչարյանի դիմումը Ընտրական օրենսգրքի, փախստականների եւ տեղական ինքնակառավարման մասին օրենքների սահմանադրականության (որոշ դրույթների) հարցի կապակցությամբ։
Դեմ առ դեմ հանդիպեցին միմյանց նկատմամբ «փխրուն» զգացումներով հայտնի Դավիթ Հարությունյանն ու Վլադիմիր Նազարյանը։
Նրանց փաստարկներն ու հակափաստարկներն էլ ներկայացնում ենք ձեզ։
Դ. Հարությունյանի փաստարկները
Կարդացեք նաև
Հայաստանի 71 համայնքներում փախստականները կազմում են 50%-ից ավելի, որոշ վայրերում՝ 100%։ Փախստականների ընտրական իրավունքից չօգտվելու դեպքում սահմանափակվելու է համայնքային նշանակության հարցերին մասնակցելու նրանց իրավունքը։
Սահմանադրության «հայ ժողովուրդ» եւ «ՀՀ քաղաքացիներ» բառակապակցությունները մի՞թե նույնացված են։ 1995-ի հանրաքվեին մասնակցել են նաեւ փախստականները՝ ստեղծելով մի փաստաթուղթ, որի առաջին տողում գրված է «հայ ժողովուրդ»։ 217 հազար փախստականի սեփականաշնորհվել է 87,6 հազար հա հող, որից ստացված հարկից ձեւավորվում է համայնքային բյուջեն։ Մի՞թե բյուջե պետք է ձեւավորեն նրանք, մարմինները՝ ոչ։ Միջազգային պրակտիկան ոչ թե հաշվառման, այլ բնակության գործոնն է որոշիչ դարձնում։
Վ. Նազարյանի հակափաստարկները
Սահմանադրության 27 հոդվածի 1-ին դրույթի մեկնաբանությունը եւ 43 հոդվածին հղումը նա թյուրիմացություն համարեց, որովհետեւ դա չի վերաբերում մարդու ընտրական իրավունքին։ Պետություն ասածը տարածք եւ քաղաքացիություն է, եւ հայտնի չէ, թե դրանցից որի սահմանը խախտելն է առավել վտանգավոր։ Երկփեղկել ժողովրդին պատկանող պետական իշխանության իրականացման մեխանիզմը՝ չի կարելի. եւ տեղական, եւ պետական կառավարմամբ ներդաշնակ նույնպետական կառավարումն է։ Պետք է ազնիվ լիներ (նկատի ուներ դիմող կողմին) եւ ասեր՝ մենք ժխտում ենք քաղաքացիությունը, գտնում ենք, որ պետությունն ունի բնակչություն, ոչ թե քաղաքացիներ։
«Հայ ժողովուրդ» տերմինի մասին էլ, որ ՀՀ նախագահն ասում է, ապա էդ ժողովրդի 2/3-րդը չի մասնակցել այդ Սահմանադրության ընդունմանը, այսինքն՝ էդ Սահմանադրությունը լեգիտիմ չէ. քաղաքական- իրավական իմաստով ժողովուրդը միայն ու միայն քաղաքացիների հանրագումարն է, եթե գումարենք օտարերկրացիներին եւ քաղաքացիություն չունեցողներին՝ կստանանք բնակչություն։ … Սխալ տեղաբաշխում չանեիք համայնքներում, որ ամեն տեղ 10%-ից չանցնեին փախստականները։ … Թող քաղաքացիություն ստանան՝ ընտրեն…
Սեփ. լր.
