«Արմատ» կազմակերպության գրասենյակի բացման արարողության ընթացքում հատուկ շնորհակալություն էին հայտնում Ավետ Գրիգորյանի եղբորը եւ Տեր Հուսիկ Լազարյանին։ Վերջինից «Առավոտը» հետաքրքրվեց, թե ինքն ինչ-ինչ միջոցնե՞ր է ներդրել այդ գրասենյակում եւ այս պատճառո՞վ է երախտիքի խոսքերի արժանանում։ Տեր Հուսիկը ժխտեց. «Ես ուղղակի հետեւել եմ շինարարությանը։ Ամառը տեղ չեմ գնացել, եկել եմ, որ տեսնեմ ինչ են անում՝ ճիշտ անեն, ուղիղ անեն»։
ՎԱՏ ԼՈՒՐ
ԱԺ պատգամավոր, նախկին (՞) վաճառական Մանուկ Գասպարյանը երեկ հայտարարեց, թե չնայած լրագրողները մինչեւ խորհրդարանի ձեւավորումը եզրակացրել էին, թե ԱԺ-ի այս կազմը թույլ է լինելու, բայց այն փաստը, որ իրենից առաջ միայն 5 ելույթ է հնչել, սակայն իր մտքերի կեսն արդեն արտահայտվել է՝ հակառակի ապացույց է։ … Ստիպված ենք վշտացնել պրն նախկին վաճառականին այն տեղեկությամբ, որ իրեն չեն «Բի-Բի-ՍԻ» ռ/կ-ն ու «Ֆորբս» հանդեսը ճանաչել որպես 20-րդ դարի մեծագույն մտածող, այլ Կարլ Մարքսին։ Եվ ինքը, ցավոք, անգամ Հայաստանում դեռեւս ճանաչված չէ որպես մտքի գիգանտ։ Ուստի, շա՜տ մեղմ ասած՝ պատճառաբանված չէ սեփական անձն ու մտքերը չափանիշ դիտելը՝ ներկա ԱԺ-ի ինտելեկտուալ կարողությունները գնահատելու համար։
