Այսօր ՀՀ քրեական գործերով վերաքննիչ դատարանում կլսվի «Հայկական ժամանակ» օրաթերթի («Օրագիր» օրաթերթի) գլխավոր խմբագիր Նիկոլ Փաշինյանի վերաքննիչ բողոքը։ Տեղեկացնենք, որ սույն գործով նախագահող դատավորն է Սուրեն Ղազարյանը, դատավորներ՝ Հենրիկ Տեր-Ադամյանն ու Եվա Դարբինյանը։ Վերաքննիչ բողոքի հիմքում «ամբաստանյալի» կողմը դրել է հետեւյալ պահանջները. նախ, բեկանել այս տարվա օգոստոսի 31-ի Կենտրոն եւ Նորք-Մարաշ առաջին ատյանի դատարանի վճիռը (հիշեցնենք, գլխավոր խմբագիր Նիկոլ Փաշինյանին ազատազրկման էին ենթարկել մեկ տարի ժամանակով), կարճել քրեական գործը՝ հանցադեպի բացակայության հիմքով, դադարեցնելով քրեական հետապնդումը Նիկոլ Փաշինյանի նկատմամբ։ Վերաքննիչ դատարանում դատական նիստը նշանակված է առավոտյան ժ. 11.00-ին։
Ռ. Մ.
