Շենգավիթի համայնքում գտնվող Չեխովի 10 շենքի բակում աղբի անչափ բարձր աճ է գրանցվել։ Համայնքի սանմաքրման աշխատակիցներն արդեն 25 օր է (բնակիչների վկայությամբ) չեն գալիս աղբը տանելու։ Առնետները պարզապես տարերքի մեջ են՝ ուտում-խմում եւ բազմանում են։ Եթե այսօր էլ աղբը չհեռացվի բակից, չի բացառվում, որ տռզած առնետները հասնեն սանմաքրման կայան եւ սկսեն կրծել պետի կամ տեղակալի բազկաթոռը։
ՏԱԿԸ ԲԱ՞Ն ԿԱՐ
Մի քանի օր առաջ «Առավոտը» հայտնել էր, որ Հայաստանի պետական կամերային նվագախմբի գործադիր տնօրեն է նշանակվել իր մյուս պետական ծառայությունից չհրաժարված՝ ՀՀ հեղինակային իրավունքի ազգային գործակալության վարչության պետ Վլադիմիր Կոստանդյանը։ Ասում են, հաջորդ օրը հազիվ բացված՝ պրն Կոստանդյանը շտապել է հրաժարվել՝ ո՛չ վարչության պետի, այլ նվագախմբի գործադիր տնօրենի պաշտոնից, իբրեւ թե պետական ծառայողի երկու պաշտոնները չհամատեղելու համար։ Կարելի է կարծել, թե նշանակվելիս չգիտեր՝ ուր է գալիս։
Կարդացեք նաև
ԴԱՐՁՅԱԼ ՔԻՉ ԵՆՔ, ՈՐՈՎՀԵՏԵՎ ՀԱՅ ԵՆՔ
1999 թվականի հոկտեմբերի 12-ին աշխարհի բնակչությունը կհասնի 6 միլիարդի։ Այն կրկնապատկվել է 1960 թվականի համեմատությամբ ու շարունակում է արագորեն աճել տարեկան 77 միլիոնով, եւ կարող է 9 միլիարդ դառնալ 2050 թվականին։ Ամենամեծ աճը տեղի կունենա աշխարհի ամենաաղքատ եւ նման աճին անպատրաստ երկրներում։ Հայաստանին, դա, հավանաբար, չի սպառնում։
ՀԱՅՈՑ ՄԱՄՈՒԼԻ ԱՌԱՋԸՆԹԱՑԸ
Վերջապես օրենքի ուժ ստացավ հայ ժուռնալիստիկայի ռահվիրա Գառնիկ Անանյանի մանկության կապույտ երազը. ԵՊՀ-ի ռեկտորի հրամանագրով ԵՊՀ-ի բանասիրական ֆակուլտետի ժուռնալիստիկայի բաժինը վերափոխվեց ժուռնալիստիկայի ֆակուլտետի։ Վստահաբար կարելի է ասել, որ այսուհետ ֆակուլտետի կարգավիճակով լրագրողի դիպլոմ ստացածները կգրեն ավելի լացակումած եւ ավելի խուճուճ նախադասություններով նյութեր։
ՀԱԿԱՍՈՒԹՅՈՒՆՆԵՐԻ ՄԻԱՍՆՈՒԹՅՈՒՆ
Սահմանադրական դատարանի (ՍԴ) նախագահ Գագիկ Հարությունյանն առաջարկում է Սահմանադրության մեջ ավելացնել, որ «ՍԴ-ն լուծում է պետական իշխանության մարմինների սահմանադրական լիազորությունների վերաբերյալ վեճերը։ Դրանց առկայության դեպքում ՀՀ նախագահի, ԱԺ-ի, կառավարության հարցումով ՍԴ-ն մեկնաբանում է Սահմանադրությունը»։ Որպես առաջարկի հիմնավորում՝ Գագիկ Հարությունյանը նշում է ՀՀ նախագահի եւ պատգամավորների մեկ-երրորդի միջեւ տեղ գտած հեռակա բանավեճը։ Խոսքն օրենքի շրջանակներում ԱԺ պատգամավորների արտահերթ նստաշրջան հրավիրելու ցանկության եւ օրենքը չխախտելով՝ նախագահի՝ այդ ցանկությունը մերժելու մասին է։
ԱՐԱՅԻԿԸ ՖԻԴԱՅԻ ԳՐՎԵՑ
Այսօրվանից վերահրատարակվում է Հայաստանի հանրապետական կուսակցության կողմից հովանավորվող «Ժամանակ» օրաթերթը։ Սրտանց ցանկանում ենք մեր գործընկերներին՝ թերթի գլխավոր խմբագիր, «Առավոտի» կադր Արա Գալոյանի ղեկավարությամբ, բարի երթ։
Սեփ. լր.
