«Վ.Սիրադեղյան, Վ.Հարությունյան եւ ուրիշներ» գործի դատաքննությունը դեռ հունի մեջ չի մտել։ Գործը այնքան ծավալուն է, որ մեղադրյալ Վ.Սիրադեղյանը եւս մեկ փաստաբանի կարիք ունեցավ։ Ի հակադրություն, դեռ բուն գործի քննությանը չանցած, ինքնաբացարկ հայտնեց մեղադրող Աշրաֆյանը, եւ դատարանը առանց հապաղելու ընդունեց ինքնաբացարկը։ Ասում են՝ սույն փաստը շարժել է գլխավոր դատախազի զայրույթը։ Կարծես սա բավական չէր, օրերս վիրահատվել է նույն գործով գլխավոր մեղադրող Մ.Բադիրյանը։ Ամբողջ սրտով ապաքինում ենք մաղթում պրն Բադիրյանին, մյուսներին էլ՝ քաջառողջություն, այլապես, մինչեւ բուն քննությունը սկսի, «դարի դատավարությունում» (ինչպես որակել էր «Ազգ»-ը) մեղադրողները քչություն են անելու։
ԶԱՐՄԱՑԱԾ Է Հ. ԳԱԼԱՋՅԱՆԸ
«Առավոտի» թղթակցի եւ ՍԻՄ նախագահ Հրանտ Խաչատրյանի միջեւ վերջերս տեղի ունեցավ հետեւյալ երկխոսությունը։ «Երբեւէ մտքներովդ կանցնե՞ր, որ մի դաշինքում եք լինելու Կիլիկիայի Նապոյի հետ»։ «Ես ինքս այլեւս ոչնչից չեմ զարմանում,- անվրդով պատասխանեց պրն Խաչատրյանը։- Հաստիքով զարմացող ենք պահում՝ ե՛ս ինչո՞ւ պիտի զարմանամ»։
Կարդացեք նաև
ՈՒՐԻՇ ԴԱՐԴ ՈՒ ՑԱՎ ՉՈՒՆԵՆ
Թուրքիայի վարչապետ Էջեւիթը ԱՄՆ նախագահ Քլինթոնի հետ Վաշինգթոնում օրերս կայացած հանդիպման ընթացքում մանրամասն քննարկել է Լեռնային Ղարաբաղի հիմնահարցի կարգավորման գործընթացը։
