Աջափնյակի համայնքի ընտրողներին «հայտնի դեպքերը» քաղաքականապես ավելի են հասունացրել։ Նրանցից մեկը երեկ «Առավոտին» հայտնեց, որ Աջափնյակի թաղապետի թեկնածու, 5-րդ ատամնաբուժարանի գլխավոր բժիշկ Լեւոն Գրիգորյանը Գալուստ Սահակյանի ընկերն է, Բուռնաշի քավորը, ԱԺ արտաքին հարաբերությունների հանձնաժողովի նախագահ, ՀԺԿ անդամ Արմեն Խաչատրյանի ընկերը։ Որպես ասվածի ապացույց՝ քաղաքացին ասաց, որ վերջիններս համարյա ողջ օրը Լեւոն Գրիգորյանի շտաբում են։
ՍԱԼՅԵՐԻԻՆ ՍՊԱՍԵԼԻՍ
Ըստ որոշ տեղեկությունների, հնարավոր է, որ «Արմենպրես» պետական բաժնետիրական ընկերության տնօրեն նշանակվի «Լոգոս» կենտրոնի ղեկավար Նաիրի Բադալյանը։
Կարդացեք նաև
ԿԱՅԾԱԿ, ԲԱՅՑ ՈՉ ԶԵԹԼՅԱՆ
Արդեն երկու օր է, որ Ջերմուկ առողջարանում հաստատվել է անձրեւոտ եղանակ։ Կայծակի ցանկացած ուժգին հարվածից հետո մի քանի ժամով տարբեր թաղամասերում անջատվում է էլեկտրաէներգիան։ Փորձագետների կարծիքով, բնության այդ խաղերը որեւէ կապ չունեն «Ջերմուկի» բաժնետիրությունը վիճարկող սփյուռքահայ գործարար Կայծակ Զեթլյանի հետ։
ՀՐԱԺԵՇՏ… ՎԵՐԵԼԱԿԻՆ
«Առավոտն» այսօրվանից գնում է արձակուրդ։ Եվ ամենից շատ ուրախ է Մամուլի տան… վերելակը։ Պարզվում է, մինչեւ 15-րդ հարկ օրվա մեջ հարյուրավոր անգամներ լրագրող տեղափոխող, լրագրողների գրածները բողոքարկող, վիճարկող, լրագրողներին «պատվեր» տվող, սիրող, ատողների բանակից մինչեւ կոկորդը կուշտ է, կշտացած է էդ վերելակ կոչվածը։ Հիմա իսկապես կհանգստանա։ Հիմա կարիք չի լինի 4 անգամ հաշվել մինչեւ 25-ը… 15 հարկ «հանգստանալով» բարձրանալու համար։ Հիմա վերելակին հաստատ չի սպառնում ո՛չ ֆիզիկական, եւ ո՛չ էլ կլինիկական մահ։
