Արմավիրի մարզպետ Ալբերտ Հերոյանը պարզաբանեց, որ մարզում առաջացած ոռոգման ջրի մի քանի օր տեւած սակավությունը կապված է Արաքս գետում թուրք սահմանապահի խեղդվելու հետ։ Նման դեպքերում դիակը գտնելու նպատակով գետի հունը փակվում է։ Այժմ դիակը գտնված է, եւ ջուրը նախկինից էլ մեծ ծավալներով ոռոգում է մարզի հողերը։ Ջրի սակավության պատճառներից մեկն էլ արտեզյան ջրհորների չգործելն է։ Եթե նախկինում մարզի տարածքում գործում էր 480 արտեզյան հոր, ապա այդ թիվը այսօր ընդամենը 70 է։ Սակայն մարզպետը խոստացավ, որ մյուս գարնանը այդ թիվը կմոտենա 300-ին, որովհետեւ իր հրահանգով ջրի վարձավճարներից գոյացած գումարներն ուղղվելու են այդ խնդրի լուծմանը։ «10 անքուն գիշերներ եմ անցկացրել սահմանի վրա՝ բանակցելով թուրքերի հետ։ Կերածս միայն ձմերուկ ու հաց է եղել։ Բայց մյուս տարի ոչ ջրի խնդիր կլինի, ոչ էլ այդ հարցով մարզպետարանի դիմաց ցույցեր»։
Արաքսի ջուրը Հայաստանի եւ Թուրքիայի միջեւ բաժանելու խնդիրների մասին հրապարակումը՝ առաջիկա համարներից մեկում։
Ա. Բ.
