«Արմենիկումը» եւ Հայաստանի դիվանագիտական կորպուսը «Արմենիկումի» հայտնագործումը բավական լուրջ խնդիրներ է առաջադրել մեր դիվանագիտական կորպուսի համար։ ԱՊՀ երկրներում գործող հայկական դեսպանատներ զանգերն ու այցելությունները հատկապես շատանում են ռուսական հեռուստատեսությունների հաղորդումներից հետո։
Ուկրաինայում Հայաստանի դեսպանատան երրորդ քարտուղարը պատմում էր, որ օրական միջինը երկու-երեք զանգ կամ այցելություն է լինում։ Դեսպանատան աշխատակիցները խնդրում են ներկայացնել համապաասխան փաստաթղթեր՝ «ՍՊԻԴ»-ի տեղական կենտրոնի ախտորոշման, հիվանդության ու բուժման ընթացքի մասին, Ուկրաինայի առողջապահության նախարարության կողմից հատուկ տեղեկանք։ Հենց մեր զրույցի ընթացքում հեռախոսազանգ ստացվեց Ղրիմից։ Հերթական վիրուսակիրը խնդրում էր պարզաբանել, թե ինչպես կարող է բուժման կուրս անցնել։ Նրան բացատրեցին, թե ինչ անհրաժեշտ փաստաթղթեր են պետք ներկայացնել եւ որ դրանք ուղարկվելու են Հայաստան, իսկ բուժման կուրս անցնելու հնարավորության մասին պատասխան կտրվի մեկ-երկու ամսվա ընթացքում։ Վերջին մասն իհարկե գցեց զրուցակցի տրամադրությունը։ Դեսպանատան աշխատակիցները նշում են, որ դիմողների մեծ մասը, ի վերջո, ներկայացնում է անհրաժեշտ բոլոր փաստաթղթերը՝ հուսալով, որ բուժվելու հնարավորություն կստանա։
«Արմենիկումի» հեղինակության աճը, կարելի է ենթադրել, լուրջ ծանրաբեռնվածություն կապահովի մեր դիվանագիտական կորպուսի համար։ Հնարավոր է, որ հատուկ կցորդներ հայտնվեն «ՍՊԻԴ»-ի գծով։
ԱՐԱ ԳԱԼՈՅԱՆ
