Վերջին շրջանում պետական ու համայնքային կառույցներին սկսել է հետաքրքրել բյուջեի ճեղքվածքի խորխորատը։ Ոմանց դա հետաքրքրում է այն լցնելու ազնիվ մղումով։ Նման մղման մի անզուգական օրինակ է սույն գրությունը։ Բանալու անցքում ինչ-որ մեկի թողած երկտողի բովանդակությունը հետեւյալն է. «10 բն. պարտք 7000 դր։ Հարգելի պարտքատեր, խնդրվում է ներկայանալ ՇՇՊՍ-ի թիվ 2 տեղամաս (նախկին 3-րդ) վճարել Ձեր պարտքը։ Չվճարելու դեպքում կդիմվի օրենքով նախատեսված պատժամիջոցների»։
Ինչ-որ հիմնարկություն շատ քաղաքավարի փորձում է հավաքել իր հասանելիք գումարները։ Քաղաքավարի, որովհետեւ պահպանված են քաղաքավարության նորմերը՝ «խնդրվում է», «Ձեր» բառը գրված է մեծատառով։ Բյուջեի խորխորատը չմեծացնելու նպատակով այդ ինչ-որ հիմնարկությունը (ՇՇՊՍ անհասկանալի անունը կրող) բլանկներ չի պատվիրել, գրությունը չի կնքել։ Մի քիչ անհասկանալի է, թե դա ինչ 7000 դրամ պարտք է, ինչպես նաեւ՝ «չվճարելու դեպքում կդիմվի օրենքով նախատեսված պատժամիջոցների» արտահայտության իմաստը։ Ո՞ւմ կողմից «կդիմվի» պատժամիջոցների։ Հնարավոր է, այսինքն՝ բացառված չէ, որ քաղաքացին է պարտավոր դիմելու օրենքով նախատեսված պատժամիջոցի։ Սա շատ անակնկալ ու արտառոց պարտավորություն կլինի։ Մանավանդ, որ ես ապրում եմ ոչ 10-րդ, այլ 11-րդ բնակարանում։ Թղթի վրա հեռախոսահամար էլ չկա։ Այլապես կպարզեի, գուցե՞ բյուջեի ճեղքվածքի խորխորատը փակելու համար՝ ես եմ պարտավոր փակել հարեւաններիս պարտքը։
ԱՐԱ ԳԱԼՈՅԱՆ
