Ըստ էության լուրջ փոփոխություններ են կատարվելու Ազգային ժողովի սննդի սպասարկման ոլորտում։ Եթե մինչեւ օրս դա իրականացվում էր մասնավոր հիմունքներով՝ ՍՊԸ-ի միջոցով, ապա հիմա նորից պետական առեւտուր կազմակերպելու խնդիր է առաջացել։ ԱԺ-ի ճաշարանը, ըստ երեւույթին, կանցնի Երեւանի առեւտրի եւ սպասարկումների պետական ձեռնարկության տնօրինության տակ։ «Կենտրոնամետ» Ազգային ժողովը կամաց-կամաց սկսում է իրականացնել «պետության կարգավորիչ դերի» մասին իր նախընտրական խոստումները։
ՎԱՏ ԼՈՒՐ
Արդեն մեկ շաբաթ է, ինչ Չարենցի 17 հասցեում գտնվող Նյութաբանության գիտաարտադրական ձեռնարկության կոլեկտիվը նյարդային վիճակում է։ Նրանց առաջարկվել է շենքն ինքնակամ ազատել եւ, բնականաբար, ինքնակամ հանձնել արժեթղթերի բորսայի նորաստեղծ տեսչությանը։ Երեկ ժամը 14.00-ի սահմաններում ինստիտուտ ներխուժեցին մի խումբ «արհեստավորներ», որոնք մեծաքանակ գիրուգրականությունը տեղաշարժելու անհաջող փորձեր ձեռնարկեցին։ Բախումնային իրավիճակն առկա է։ Այսօր նյութաբանները ժողով են հրավիրելու՝ որոշելու համար իրենց անելիքները։
