Խախտելով նախնական պայմանավորվածությունները, Ադրբեջանի նախագահն իր հետ լրագրողներ էր բերել Ժնեւի հանդիպմանը։ Հայաստանի նախագահի մամուլի գրասենյակի ղեկավար Հասմիկ Պետրոսյանից «Առավոտը» տեղեկացավ, որ երբ հանդիպման ավարտից հետո Ռոբերտ Քոչարյանը հրավիրվել է համատեղ հայտարարությամբ հանդես գալու՝ նա հրաժարվել է, պատճառաբանելով հայ լրագրողների բացակայությունը։
ԴՈՒ ՀՀՇ ԵՂԵԼ ԵՍ
Հակառակ Աջափնյակի թաղապետի թեկնածու Արծրուն Խաչատրյանի հավաստիացումների, թե ինքը երբեք չի եղել ՀՀՇ-ի անդամ, տեղյակ աղբյուրները հակառակն են պնդում։ Արծրուն Խաչատրյանը ՀՀՇ-ի անդամ է եղել Մալաթիա-Սեբաստիայի տարածքում՝ եւ վերահաշվառման համար էլ դիմումը կրկնել է Աջափնյակում։
Կարդացեք նաև
«ՀՀՇ-Ի ԱՐՏԱԴՐԱԿԱՆ ԹԱՓՈՆԸ» ՇԱՐՔԻՑ
ՀՀ էներգետիկայի նախկին նախարար Մերուժան Միքայելյանը նոր պաշտոնի է նշանակվել։ Նա հիմա Լեւոն Բարխուդարյանի տեղակալն է, որը ժամանակին լավ հարաբերություններ ուներ ՀՀՇ-ի հետ։ Տեսնես, այդ դեպքում «արտադրական թափոնը» որ աթոռն է զբաղեցնում ֆինանսների նախարարությունում։
ԹԱՐՄ ՆՇԱՆԱԿՈՒՄ
ԼՂՀ կառավարության որոշմամբ Կարեն Ներսիսյանն ազատվել է ԼՂՀ պետական կենսաթոշակային հիմնադրամի նախագահի պաշտոնից, համաձայն իր դիմումի։ Նրան կփոխարինի Վասիլի Ավետիսյանը։
