Երեկ խմբագրություն զանգահարեց փաստաբան Ժուդեքս Շաքարյանը եւ հայտնեց, որ քրեական գործով, ըստ մեղադրանքի, Ստեփան Մանուկյանի՝ ՀՀ քր. օր. 99 հոդվածի 1-ին կետով (Շահադիտական դրդումներով դիտավորյալ սպանություն), որով իր պաշտպանյալը ս/թ. մարտի 2-ին Մալաթիա-Սեբաստիա համայնքի Առաջին ատյանի դատարանի կողմից դատապարտվել էր 14 տարվա ազատազրկման, երեկ Վերաքննիչ դատարանը, նախագահությամբ Սերժ Ավետիսյանի, բավարարեց փաստաբան Ժ. Շաքարյանի եւ պետական մեղադրանքը պաշտպանող դատախազ Ս. Վարդապետյանի միջնորդությունը՝ բեկանելով վերը նշված դատավճիռը, եւ քրեական գործը վերադարձրեց լրացուցիչ նախաքննության։
ՎԱՏ ԼՈՒՐ
Քաղաքապետարանի առջեւ երեկ իրենց բողոքի միտինգն էին անում պետական հանրախանութի (ԳՈՒՄ) ճանապարհի մանրավաճառները։ Նրանց արգելված է այլեւս խոչընդոտել անցորդների ճանապարհը՝ մայթին շարված սեղան-աթոռներով։ «Չենք կարող տոնավաճառներում վաճառել, քանի որ այնտեղ որպես վարձ դոլար են պահանջում»,- բողոքում էին կանայք։ Բողոքավոր մանրավաճառները թեեւ սպառնում էին փակել փողոցը, սակայն սուրացող ավտոմեքենաների տակ ընկնելու վախը նրանց հետ պահեց այդ մտքից։ Որոշ ժամանակ անց, մանրավաճառների խումբը լքել էր քաղաքապետարանի տարածքը։ Սակայն իրենց նախկին աշխատանքով զբաղվելու թույլտվություն, որքան «Առավոտին» է հայտնի, նրանք չեն ստացել։
