Ըստ Ստեփանակերտից հասած ստույգ լուրերի, հուլիսի 14-ի երեկոյան Սամվել Բաբայանը հյուընկալվել է ԼՂՀ նախագահ Արկադի Ղուկասյանի առանձնասենյակում։ Հայտնի չէ, թե նրանք ինչ են խոսել, սակայն հուլիսի 15-ին այդպես էլ որեւէ հրամանագիր չհետեւեց Սամվել Բաբայանի նոր նշանակման մասին։ Ինչպես 98-ի հունվարին ասում էր վարչապետ Ռոբերտ Քոչարյանը, լավ է, որ իրար բարեւելու եւ հարցեր քննարկելու տեղ է մնացել։
ՎԱՏ ԼՈՒՐ
Թեպետ իշխանական վերեւները եւ նրանց սպասարկող լրատվամիջոցները հետեւողականորեն թաքցնում են, թե ինչ նպատակով է տեղի ունենալու Ալիեւ-Քոչարյան հանդիպումը Ժնեւում, սակայն հայտնի է դարձել, որ այնտեղ քննարկվելու է ԼՂ հակամարտության կարգավորման նոր փաստաթուղթ՝ մշակված ԵԱՀԿ Մինսկի խմբի կողմից։ Իսկ այդ փաստաթղթում, ըստ Ադրբեջանի նախագահի աշխատակազմից ստացված լուրերի, որոշակի «ճշգրտումներ» է մտցրել տիկին Մադլեն Օլբրայթը։ Այդ տիկնոջից ո՞վ է վերջերս «խեր» տեսել։
