1999 թ. հունիսի 28-ին կառավարության ֆինանսատնտեսական գործունեության ստուգման արդյունքներով քրեական գործ է հարուցվել եւ այժմ տարվում է նախաքննություն։ ԼՂՀ նախկին վարչապետ Ժիրայր Պողոսյանը 1999 թ. հուլիսի 9-ին որպես կասկածյալ ձերբակալվել էր։ Հուլիսի 12-ին Ժ. Պողոսյանին մեղադրանք է առաջադրվել ԼՂՀ քր. օրենսգրքի 232 հոդվածի 1-ին մասով (ապօրինի զենք, զինամթերք ձեռք բերելու, պահելու), ինչպես նաեւ քր. օրենսգրքի 71 հոդվածի 1-ին մասով (պետական գաղտնիք պարունակող փաստաթղթի կորստի համար)։ Այդ մասին «Առավոտին» տեղեկացրեց ԼՂՀ գլխավոր դատախազ Մավրիկ Ղուկասյանը մեզ հետ ունեցած ճեպազրույցին։ Նա նաեւ հայտնեց, որ փոխվել է խափանման միջոցը. Ժիրայր Պողոսյանն ազատվել է կալանքից, խափանման միջոց է ընտրվել ստորագրություն տալը՝ չհեռանալու մասին։ Մեր այն հարցին, թե որքանով են իրականությանը համապատասխանում Ժ. Պողոսյանի կողմից հայտարարված հացադուլի մասին լուրերը, Մ. Ղուկասյանը պատասխանեց, որ, իրոք, ձերբակալվելուց հետո նա նման հայտարարություն արել էր, սակայն ավելի ուշ տեղեկացրել է գլխավոր դատախազին այդ մտադրությունից հրաժարվելու մասին։
ՌՈՒԶԱՆ ԻՇԽԱՆՅԱՆ
Ստեփանակերտ
