Շնորհակալություն եմ հայտնում Ձեզ ՀՀ վարչապետին ուղղված նամակս տպագրելու համար (թաղման ծախսերի վերաբերյալ)։ Իմ բարձրացրած հարցը արժանացավ ՀՀ ՆԳ նախարար Ս. Աբրահամյանի, Երեւանի քաղաքապետի տեղակալ Վ. Վարժապետյանի, քաղաքապետարանի բնակչության սպասարկման հատուկ ծառայությունների վարչության տնօրեն Համլետ Ավետիսյանի ուշադրությանը։ Այն օպերատիվ կարգով քննարկվեց եւ մեր ընտանիքին գոհացնող լուծում ստացավ։ Ես իմ գոհունակությունն եմ արտահայտում եւ հավատում, որ դեռեւս ամեն ինչ չէ, որ կորած է։
ՄԻՔԱՅԵԼ ԱՐԶԱՔԱՆՅԱՆ «ԱՌԱՎՈՏ» ՕՐԱԹԵՐԹԻՆ
Հարգելի խմբագրություն, ձեր թերթի հուլիսի 1-ի համարում զետեղված թոշակառու Միքայել Արզաքանյանի «Քանի՞ անգամ կարելի է վճարել նույն թաղման համար» վերտառությամբ դիմում-հոդվածը քննարկվել է Երեւանի քաղաքապետարանի «Բնակչության հատուկ սպասարկում» պետական փակ բաժնետիրական ընկերության կոլեկտիվում։ Հոդվածագրի մեջբերած փաստարկները ստուգվել են եւ արձանագրված կանոնակարգային ու կարգապահական խախտումների համար ընկերության նախագահ Համլետ Ավետիսյանի հրամանով աշխատանքից հեռացվել է Շահումյանի գերեզմանատան փորող բանվոր Արտավազդ Մարգարյանը, իսկ գերեզմանատան վարիչին ու հսկիչին հայտարարվել է խիստ նկատողություն։ Երեւանի քաղաքապետարանի լրատվության եւ հասարակության հետ կապերի բաժին
